• Welcome to Tamil Brahmins forums.

    You are currently viewing our boards as a guest which gives you limited access to view most discussions and access our other features. By joining our Free Brahmin Community you will have access to post topics, communicate privately with other members (PM), respond to polls, upload content and access many other special features. Registration is fast, simple and absolutely free so please, join our community today!

    If you have any problems with the registration process or your account login, please contact contact us.

Andal Thoothu

ஸ்ரீ ஆடி ஆனந்தம்--"ஆண்டாள் தூது!!!
(பதிவு 1)

நாளை(17/07/2021),ஆடி மாதப்பிறப்பு. இந்த மாதம் பகவானுக்கும், நித்யசூரி களுக்கும்,தேவ/தேவதைகளுக்கும் உகந்தமாதம்.பாற்கடலில் பள்ளி கொண்டுள்ள பரந்தாமன் யோகநித்திரை
துவங்கும் மாதம். தேவர்களின் ஒரு நாள் என்பது, நமது ஒரு ஆண்டுக்காலமாகும். தை முதல் ஆனி முடிய அவர்களது பகல்நாள்.ஆடி முதல் மார்கழி வரை அவர்களது இரவுநாள்.எனவே அவர்கள் நித்திரை கொள்ளும் முன் அவர்களைப் போற்றிப்பாடி, வணங்கி, திருப்பள்ளி கொள்ள வைக்கிறோம்.அதே போல மார்கழி மாதத்தில் அவர்களை, நித்திரை
யிலிருந்து,திருப்பள்ளிஎழுச்சி பாடித் துயில் எழுப்பி விஸ்வரூப தரிசனம் சேவிக்கிறோம்.ஆடிமாதத்திலும்,மார்கழி மாதத்திலும் நம்மை முற்றிலும் பகவத் சம்பந்தமான கைங்கர்யங்களில் ஈடுபடு
த்திக் கொள்ள வேண்டும் என்று முன்னோர் வகுத்துவைத்திருக்கிறார்கள்.

இந்த உலகத்துக்கே, ஆதாரமாக விளங்கும் பூமிப்பிராட்டி ஆண்டாள் நாச்சியார் அவதரித்த மாதம் ஆடி மாதம்!
பூமாலை சூடிக்கொடுத்த நாச்சியார் ஆண்டாள் !
பாமாலை பாடிக் கொடுத்த நாச்சியார் ஆண்டாள்!!
ஆண்டாள் ஆயர்பாடிக் கண்ணனைப் பாடினார்!
திவ்ய தேசங்களில் எழுந்தருளியிருக்கும் எம்பெருமானைப் பாடினார்!!
ஆண்டாள் பாடிய "திருப்பாவை" அறியாதார் இல்லை.
"கோதை தமிழ் ஐயைந்தும்,ஐந்தும் அறியாத மானிடரை வையம் சுமப்பதும் வமபு" என்பது பூர்வர் வாக்கு.
ஆண்டாள் பாடிய இன்னொரு பாமாலையான "நாச்சியார் திருமொழியும்"திருமால் அடியார்கள் நன்றாக அறிவார்கள்.

கடந்த இரண்டு ஆண்டுகளாக"ஆடி ஆனந்தம்" என்னும் தொடரில்,ஆடி மாதம் முழுதும் பூமிப்பிராட்டியார் ஆண்டாள் வைபவங்களை அநுபவித்தோம்.2019ல் ஆண்டாள் வைபவங்கள்,ஆண்டாள் அவதார ஸ்தலமான ஸ்ரீவில்லிபுத்தூரில் நடைபெறும் உற்சவ விசேஷங்கள் ஆகியவற்றைப் பார்த்தோம்.
2020ல் பல்வேறு ஆசார்ய ஸ்வாமிகள் ஆண்டாளைப் போற்றிப் பாடிய பாசுரங்கள்/ஸ்லோகங்களை
"ஆண்டாள் போற்றி" என்று அநுபவித்தோம்.

இந்த ஆண்டு, ஆண்டாள் பாடிய பாசுரங்
களில் சிலவற்றை தேர்ந்தெடுத்துப் பார்ப்போம்.திருப்பாவைப் பாசுரங்களின் அர்த்த விசேஷங்களை ஒவ்வொரு மார்கழிமாதத்திலும் பார்த்து வருகிறோம்.
ஆண்டாள் பாடிய இரண்டாவது பிரபந்தம்
"நாச்சியார் திருமொழி"பூதேவி நாச்சியார்/கோதை நாச்சியார் அருளிச் செய்த திருமொழி ஆதலால் நாச்சியார் திருமொழி.ஒரே நாயகன் ஸ்ரீமந் நாராயணின் நாயகி பாடியதால் நாய்ச்சியார் திருமொழி என்றும் சொல்லுவர்.இந்தத் திருமொழியின் 143 பாசுரங்களின், ஆழ்ந்த அர்த்தங்களையும் இந்த ஒரு மாத காலத்துக்குள் பார்ப்பது என்பது சற்றே கடினமான காரியம்.
எனவே நாச்சியார் திருமொழியில் ஆண்டாள் கண்ணபிரானுக்கு அனுப்பிய "தூது" பாசுரங்களை எடுத்து "ஆண்டாள் தூது" என்னும் தலைப்பில் அநுபவிப்போம்.

ஸ்ரீவைஷ்ணவ சம்பிரதாயத்தில் தூது:

ஸ்ரீராமாயணத்தில்,திருவடி ஆஞ்சநேயர்
ஸ்ரீராமரின் தூதுவராக,இலங்கை அசோகவனத்தில் இருந்த சீதாப் பிராட்டிக்கு நற்செய்தி கொண்டு சென்றார்.மகா பாரதத்தில் சாக்ஷாத் ஸ்ரீகிருஷ்ணரே பாண்டவ தூதராக கெளரவர் சபைக்குச் சென்றார்.
பக்தன் சென்ற தூது பலித்தது;பகவான் சென்ற தூது பலிக்கவில்லை !

ஆழ்வார்கள் பக்தி மேலீட்டால்,தங்களை எம்பெருமானிடம் சேர்த்துவிடும்படி பலரையும் தூது விட்டார்கள்.நெஞ்சு விடு தூதில் தம் நெஞ்சத்தையே தூது விட்டார்கள்.
பறவைகள்--குயில்,கிளி,நாரை--,
வண்டு,பூக்கள்,மேகம்,மழை ஆகிய வற்றைத் தூது விட்டார்கள்
திருமங்கை ஆழ்வார் காக்கை,
செம்போத்து,கோழி,பல்லிக்குட்டி ஆகியவற்றையும் தூது விட்டார் !!

ஆண்டாள் அனுப்பிய தூதுவர்கள்:

ஆண்டாள் திருப்பாவையில் எம்பெருமானிடம் கைங்கர்யம்(பறை) வேண்டிப் பிரார்த்தித்தார்.--
'பறை தருதியாகில்'
'பாடிப் பறை கொண்டு',
'இறைவா ! நீ தாராய் பறை',
"குற்றேவல் எங்களைக் கொள்ளாமல் போகாது,இற்றைப் பறை கொள்வான் அன்று காண் கோவிந்தா !,
எற்றைக்கும் ஏழேழ் பிறவிக்கும் உன் தன்னோடு,
உற்றோமே ஆவோம்; உனக்கே நாம் ஆட்செய்வோம்;
மற்றை நம் காமங்கள் மாற்று"
"அங்கு அப்பறை கொண்ட ஆற்றை"

கைங்கர்யம் கிடைத்தாலும், ஆண்டாள் விரும்பியபடி, எம்பெருமானோடு சேர முடியவில்லை.அந்த ஆற்றாமையால் அவரோடு சேர வேண்டும், அவரை எப்படியாவது விரைவில் அடைந்து விட வேண்டும் என்னும் ஆர்த்தியில் விளைந்தவையே நாச்சியார் திருமொழி பாசுரங்கள்.பக்தி மிகத் தீவிரமானால் எப்படியாவது,யார் மூலமாவது எம்பெருமானை உடனே அடைந்து விட வேண்டும் என்னும் பேர்ஆர்த்தி யினால்,அவருக்குத் தூது விடுகிறார்.

ஆண்டாளின் தூதுவர்கள்:
1.காம தேவன் மன்மதன்
2.நெஞ்சு.
3.குயில்
4.மயில்
4.சங்கு(பாஞ்சஜன்யம்)
5.மேகம்.
6.மழை
7.கடல்
8.காந்தல் மலர்கள்
9.தோழிகள்

(-அடியேன் பார்த்தசாரதி ராமாநுஜ தாசன்)

1626500473613.png


1626500483480.png


1626500491174.png
 
OP
OP
praveen

praveen

Life is a dream
Staff member
ஸ்ரீ:
ஆடி ஆனந்தம்--"ஆண்டாள் தூது!!!
(பதிவு 20)

5-6"எத்திசையும் அமரர் பணிந்து ஏத்தும், இருடீகேசன் வலி செய்ய,
முத்தன்ன வெண் முறுவல்,செய்ய வாயும் முலையும் அழகு அழிந்தேன் நான்!
கொத்தலர் காவில், மணித் தடம் கண் படை கொள்ளும் இளங்குயிலே !
என் தத்துவனை வரக் கூவிற்றியாகில்
தலை அல்லால் கைம்மாறு இலேனே "


விளக்கவுரை:

பூக்கள் கொத்துக் கொத்தாக மலரும்
சோலையிலே,அழகான,சுகமான ஒரு இடத்திலே உறங்குகின்ற இளங்குயிலே!

எல்லா திசைகளிலும்,தேவர்கள் வணங்கித் துதிக்கும்படியான பெருமை வாய்ந்த,காண்போர்களின் இந்திரியங்
களை எல்லாம் கொள்ளைகொள்ளுபவன்
ஆன எம்பெருமான் தன்னை எனக்குக் காட்டாமல்,மி(மு)றுக்குக்களைப் பண்ண, அதனால்,என்னுடைய முத்துப் போல் வெளுத்த முறுவலும்,சிவந்தஅதரமும், மார்பகங்களும் அழகு அழியும்படிக்கு வெளுத்துப் போயின.நான் உயிர்
தரித்திருப்பதற்கு மூல காரணமான/தத்துவமான அந்த எம்பெருமானை,
இங்கே வரும்படி கூவினாயானால்,
என் வாழ் நாள் உள்ளவளவும், என் தலையை உன் காலிலே வைத்து சேவை செய்வது தவிர வேறொரு பிரதி உபகாரம் அறியேன்.

எத்திசையும் அமரர் பணிந்து ஏத்தும் :

எந்தத் திசையிலும்,எங்கு பார்த்தாலும் துர்மாநிகளாய்--தனக்கு மிஞ்சியவன் இல்லை என்று மிகுந்த அகங்காரம் உடையர்களான-- ப்ரஹ்மாதி தேவர்கள்-தென் திசையில் யமன்,வட திசையில் குபேரன்,கிழக்கே இந்திரன்,மேற்கே வருணன் மற்றும் பல தேவர்கள் பல கோணங்களில்-- இப்படியாக
அவரவர் அபிமானங்கள்/கர்வங்கள் தொலைந்து, எம்பெருமான் திருவடி களில் தண்டம் சமர்ப்பித்து,அவரைக் கீர்த்தனம்/ஸ்தோத்ரம் பண்ணிக் கொண்டிருக்கிறார்கள்.

இருடீகேசன் வலிசெய்ய:

இப்படி சர்வ தேவர்களும்/ஜனங்களும் வணங்கத்தக்கவராய் இருக்கிறவர் என் சர்வ இந்திரியங்களையும், கொள்ளை கொண்ட பின்னர், தன்னுடைய செளலப்ய குணத்தை எனக்குக் காட்டி என்னை ஆட்கொள்ளாமல்,சத்ருக்களு
டைய கோஷ்டியில் காட்டும் மிறுக்குகளை
என்னிடம் செய்கிறார்.

முத்தன்ன வெண் முறுவல்,செய்ய வாயும், முலையும்,அழகு அழிந்தேன் நான்

நான் எனது முத்துப் போன்ற பற்களால் செய்யும் புன்னகை மற(றை)ந்து போனது.சிவந்த அதரமும் (இயற்கை
யாகவே சிவந்த அதரங்களுக்கு,மேலும் சிவப்பிட்டு),ஓரிடு சிவப்பும் வேண்டாத மார்பகங்களும் அழகு இழந்து வெளிறிப் போயின.

என்னிடம் மிறுக்குகள் பண்ணுகைக்காக-
தனக்கு ஜீவனமாகக் கொள்வதையும்-தாரகம்(முறுவல்),போஷகம்(அதரம்),
போக்யம்(மார்பகம்) அழித்து நிற்கிறார்.
நானன்றோ அவர்;அப்படியிருக்க
என்னை அழிய விட்டு,நாளை அவர் என்னைத் தேடி வருகையில்,நான் அழகிழந்து,ஒளியிழந்து இருப்பதைப் பார்த்து துடி,துடிக்கப் போகிறார்.

கொத்தலர் காவில் மணித் தடம் கண் படை கொள்ளும் இளங்குயிலே !

பூக்கள் கொத்துக் கொத்தாகப் பூத்துக் குலுங்கும், அழகிய சோலையில் நல்ல வசதியான இடத்தைத் தேர்ந்தெடுத்து,
மலர் படுக்கையில் தூங்கிக் கொண்டி
ருக்கும் குயிலே !

எம்பெருமான் மிறுக்கால்,நான் இங்கே அழகிழந்து, அழிந்து கொண்டிருப்பதைப் பார்த்தும், நீ கிடந்து சுகமாய் தூங்கிக் கொண்டிருக்கிறாய் என்றால் உனக்கு எத்தனை ஆணவம் ?

என் தத்துவனை வரக் கூகிற்றியாகில்:

நான் ஜீவித்திருப்பதற்கு மூல காரண மான,எனக்கு சத்தா ஹேதுவான-நான் சத்தை பெற்று ஒரு ஜீவனாக இருப்ப
தற்குக் காரணமான,பர தத்துவனை வரும்படி கூவுவாயாகில்--

"இது கூவி அழைக்க வேண்டும்படி, அவன் வரவு தாழ்க்கச் செய்தேயும்,
தன் சத்தை அவன், என்று இருக்கிறாள் காணும்"
ராவணன் சீதாப்பிராட்டியிடம் ஸ்ரீராமரின் மாயா சிரசைக் காட்டி,ராமரைக் கொன்று விட்டதாகச் சொன்ன போது,பிராட்டி உடனே பெருந்துக்க முற்று கண்ணீர் பெருக அழுதார்.ஆனால் ராமர் உயிர் துறந்தார் என்று கேட்ட அடுத்த நொடியே,
சீதை உயிர் விட்டிருக்க வேண்டும் அன்றோ? என்று நம்பிள்ளை -நஞ்ஜீயரைக் கேட்க,

"ஜ்ஞானம் அன்று- இவள் ஜீவனத்துக்கு ஹேது -பெருமாள் சத்தை யாய்த்து –
அவள் உளராகையாலே இருந்தாள் காணும் "என்று அருளிச் செய்தார் நஞ்ஜீயர்.--சீதையின் உயிர்த்துடிப்பே பெருமாள்-ராமர் என்னும் சத்தை/சத்து.ஆதலால் அந்தச் சத்தை இல்லை யென்றால்,(அந்தச் செய்தி சீதைக்குத் தெரியாமல் இருந்தாலும்) அந்தக் கணமே சீதை உயிர்விட்டிருப்பார்.ராமர் இல்லை என்னும் செய்தி/ஞானம் அவருக்கு அவசியம் இல்லை.

எம்பெருமான் உளன் ஆகில் நான் உளேனாம் படியாய்(உயிரைப் பிடித்துக் கொண்டு இருக்கிறேன்.வேறு எந்த அழகும்,ஆசையும்,நினைவுப் இல்லாமல்) வைத்திருக்கிற அவர் வரும்படி கூவ வல்லை.

தலை யல்லால் கைம்மாறு இலேனே :

தலையை அறுத்துக் கொடுத்துச் செய்யும் கைம்மாறு அல்ல இது;
காலமெல்லாம் உன் திருவடிகளில் தலையால் வணங்கி,உனக்குப் கைங்கர்யம் செய்வேன் என்பதாகும்.

"நீ பண்ணின உபகாரத்துக்கு இத்தலையால் செய்வது ஒன்று உண்டோ என்று என் தலையை உனக்காக்கி,
காலம் எல்லாம் உன் காலிலே வணங்கி வர்த்திக்கும் அத்தனை என்கிறாள்"
(நஞ்ஜீயர் உரைத்ததாக நம்பிள்ளை).

5-7:"பொங்கிய பாற்கடல் பள்ளி கொள்வானைப் புணர்வதோர் ஆசையினால், என்
கொங்கை கிளர்ந்து குமைத்துக், குதுகலித்து,ஆவியை ஆகுலம் செய்யும்
அங்குயிலே ! உனக்கு என்ன மறைந்து உறைவு,ஆழியும் சங்கும் ஒண் தண்டும்
தங்கிய கையவனை வரக் கூவில்,
நீ சாலத் தருமம் பெறுதி"


விளக்கவுரை:

"அழகிய குயிலே!
அலைகள் பொங்கும், திருப் பாற்கடலில்
பள்ளி கொண்டருளும் எம்பெருமானோடு,
பிரியாதே கூடியிருக்க வேணுமென்னும் ஆசையினால்,எனது மார்பகம் கிளர்ந்து
குதூகலித்து எனது உயிரை உருக்கி வியாககூலப் படுத்துகிறது. என் கண்ணுக்குப் புலப்படாமல் நீ மறைந்தி
ருப்பதனால்,உன்னால் எனக்கு என்ன பயன்? திருவாழியும்,திருச்சங்கும் கதை
யும் பொருந்திய திருக் கைகளுடைய பெருமான் இங்கே வரும்படி நீ கூவுவாய் ஆகில் மிகவும் தர்மம் செய்தாய் ஆவாய்.

பொங்கிய பாற்கடல் பள்ளி கொள்வானைப்:

உயர்ந்த பரமபதமே இருப்பிடமாய் இருக்க அதை விட்டு வந்து, அவருடைய ஸ்வ சந்நிதானத்தாலே திரைக் கிளப்பத்
தை உடைத்தான திருப் பாற் கடலிலே
பள்ளி கொண்டு அருளுகிறவனை.

பொங்கிய பாற்கடல் என்பது--சாதாரண ஒரு சந்திரனைக் கண்டாலே கடல் பொங்கும் போது,சிறந்த பத்து சந்திரர்
களைக் கண்டால் கடல் பொங்குவதற்கு அளவுண்டோ? சந்திரன் தன் தோஷங்கள் நீங்க பாற்கடல்நாதன் திருவடிகளைச் சிக்கெனப் பிடித்துப் பிரார்த்தித்து தோஷம் நீங்கப் பெற்றான்.ஆதலால் சந்திரன் பத்து உருவங்களை எடுத்துக் கொண்டு,பாற்கடல்நாதன் திருவடிகளில் விழுந்து கிடக்கிறான்.அந்தப் பத்து சந்திரர்களே எம்பெருமானின் பத்து வட்ட வடிவமான நகங்களாவன.எனவே பத்துச் சந்திரர்களை ஒரே சமயத்தில் கடல் கண்டால் கடல் பொங்குவது எவ்வளவு பெரிதாக இருக்கும் ?(ஸ்ரீவரதராஜ ஸ்தவத்தை எடுத்துக் காட்டுகிறார் பெரிய வாச்சான் பிள்ளை)

மேலும் "சந்த்ரமா மனசோ ஜாதா"
(புருஷஸுக்தம்)-என்பதால் எம்பெருமா
னின் மனதிலிருந்து உருவானவன் சந்திரன், ஆதலால்,அவர் தம் திருவுள்ளத்திலிருந்து ஒரு சிறிய திவலை அவனுக்கும்அளித்திருப்பார
ன்றோ ! -அப்படிப்பட்ட சந்திரனைக் கண்டாலே கிளர்ந்து பொங்கும் கடல்,
அந்தப் பரமாத்மா தானே வந்து படுகாடு கிடந்தால் சொல்ல வேண்டுமோ ?

புணர்வதோர் ஆசையினால்:

அவனோடு சேர்ந்து கலக்க வேணும் என்கிற ஆசையினாலே –

கொங்கை கிளர்ந்து குமைத்துக் குதுகலித்து ஆவியை ஆகுலம் செய்யும் :

அவரை அடைய வேண்டும் என்னும் ஆசை உண்டாய் இருக்கச் செய்தேயும், ஸ்த்ரீத்வத்தை/பெண்மையைக் கருதி நான் அடங்கி அமைதியாக இருந்தாலும்,
என் தேக அவயவமான மார்பகம் இதை அறியாதன்றோ? என்னைப் போல ஆறி இருக்காமல் எம்பெருமான் வருகிறார் என்று உற்சாக மிகுதியால் பருத்து நிற்கின்றன.அவை மார்புக்கு சுமையாய்
நின்று,நெஞ்சை நலிந்து என்னுயிரை உருக்குவதாய் உள்ளன.

அங்குயிலே,உனக்கு என்ன மறைந்து உறைவு:

அழகிய குயிலே !நான் இவ்வாறு கிலேசப் பட்டு,பிரிவாற்றாமை என்னும் துக்கக்கடலில் தத்தளிக்க,நீ வெய்யில் காணாமல் இருக்கும் இடத்தில்,
என்னிடமிருந்தும் மறைந்து/விலகி மலர்ப் படுக்கையில் படுத்து சுகமாக இருக்கிறாயே?

ஆழியும் சங்கும் ஒண் தண்டும்
தங்கிய கையவனை:

அடியார்களுக்கு, விரோதி நிரசனம் பண்ணுவதற்காக ,அந்த சமயத்தில்
தேட வேண்டாத படி,அவர்களின் ரஷணத்துக்காக எப்போதும் சங்கு,
சக்கரம்,தண்டு முதலான ஆயுதங்களைக் தரித்துக் கொண்டு இருக்கிறவரை வரும்படி கூவுதியாகில்.
(இங்கு ஆண்டாளின் விரோதி அவர் வராதது தானே.மற்றவர்களின் விரோதி
யைத் தொலைக்க ஆயுதங்கள் ஏந்திக் கொண்டிருப்பவர்,என் விரோதியைத் தொலைக்க அவரே வந்தாலே போதுமே!)

வரக் கூவில்:

அவர் வரும்படி,வாக் தர்மமாக நீ கூவுவாய்.அப்படி ஒரு வாக்கைச் சொல்வதால் நான் சத்தை பெறுவேன்.
உன்னுடைய ஒரு வாய்ச்சொல்லாலே,
தாகத்துக்கு தண்ணீர் கொடுத்து ஆற்றுவதைப் போல,என் துயரத்தை ஆற்ற முடியும்.

நீ சாலத் தருமம் பெறுதி:

நான் சத்தை பெறாவிட்டால் உயிரிழப்பேன்.நான் தரிக்கவில்லை என்றால் எம்பெருமான் தரிக்க மாட்டார்.எம்பெருமான் இல்லாமல்
இந்த ஜகமே,உபய விபூதிகளே இல்லாமல் போய்விடும்.எனவே நீ அவரிடம் சொல்லும் வார்த்தையால் இந்த ஜகத்தையே ரஷித்தாய் என்னும் ஏற்றம்-ஜகத்தை ரஷித்த தர்மம் என்னும் பெரும் பேறு பெருவாய் !!

முன்பொரு யுகத்தில் ஒரு ஆண்புறா தன் பேடையைக் கொன்ற,வேடன் என்றும் பாராது,அவன் பசியாற்றத் தானே நெருப்பில் விழுந்து, வெந்து உணவானது.அத்தகைய பறவை இனத்தைச் சேர்ந்த நீ உன்னை அழிக்க வேண்டாமல்,உனக்கு எந்தத் துன்பமும் நேராமல்,எம்பெருமானை இங்கு வருமாறு கூவுதல் என்னும் யுக்தி செய்தால் போதும்.

(--அடியேன் பார்த்தசாரதி ராமாநுஜ தாசன்).
படங்கள்:
1.தத்துவன்--ஆடி 18ல் சேவை சாதித்தபடி
2 ஸ்ரீரங்கம் வெளி ஆண்டாள் சந்நிதியில்,
ஆண்டாள் ஸ்ரீபத்ரிநாராயணர் அலங்காரத்தில்.
3,4: ஸ்ரீரங்கம் பரமபத நாதன் சந்நிதியில்
ஆண்டாள் மூலவர் ஸ்ரீ பார்த்தசாரதி அலங்காரத்தில்; உற்சவர் 'மருதம் முறிய
நடை கற்றவன்' அலங்காரத்தில்.

1628150163404.png


1628150171455.png


1628150179074.png


1628150187637.png
 
OP
OP
praveen

praveen

Life is a dream
Staff member
ஸ்ரீ:
ஆடி ஆனந்தம்--"ஆண்டாள் தூது!!!
(பதிவு 21)

5-8"சார்ங்கம் வளைய வலிக்கும் தடக்கைச் சதுரன்,பொருத்தமுடையன்,
நாங்கள் எம்மில் இருந்தொட்டிய கச் சங்கம்,நானும் அவனும் அறிதும் !
தேன்கனி மாம் பொழில் செந்தளிர் கோதும் சிறு குயிலே ! திருமாலை
ஆங்கு விரைந்து ஒல்லைக் கூகிற்று யாகில், அவனை நான் செய்வன காணே !

விளக்கவுரை:


மாந்தோப்பிலேயே இருந்து,நல்ல இனிப்பான மாம்பழங்களை உண்டு,
இனிப்புத் தெவிட்ட,அதற்காக,சிவந்த மாந்துளிர்களை வாயலகால் கொத்துகிற இளங்குயிலே!
தனது வில்லை வளைத்து வலிக்கும் சக்தியை யுடைய பெரிய திருக்கைகளை யுடையனாய், சகலவித சாமர்த்தியமும் உடையனான எம்பெருமான்,பிரியம் செலுத்துவதிலும் வல்லமை பெற்றவன்;
அவரும் நானும் ஆக இருவரும் சேர்ந்தி
ருந்தபோது எங்களுக்குள் ரஹஸ்யமாக
செய்து கொண்ட சங்கேதத்தை/சங்கல்பத்தை நாங்கள் இருவருமே அறிவோமேயன்றி வேறொருவரும் அறியார்; தற்போது தூரமான இடத்தில் இருக்கிற திருமாலை,இங்கு விரைந்து வரும்படி கூவுகை ஆகில், அவர் இங்கு வருவார்.அதன்பின் அவர் விஷயத்தில்,
நான் செய்யப் போகிற மிறுக்குக்களைக காணக் கடவை"

சார்ங்கம் வளைய வலிக்கும்:

ஸ்ரீராமபிரான் வில் பிடித்த பிடியிலும்,
வில் வளைத்த படியிலும் தோற்று இருந்த
வீர பத்னி சீதாப்பிராட்டி.
"ராம சாபாஸ்ரயாம் வநே" என்கிறபடியே
ராமரின் வீர வில்லுக்கு ஆஸ்ரயணப்
பட்டு இருந்தார்.அவ்வாறாக எம்பெருமா
னின் சார்ங்கத்துக்கு/அதை அவர் பிடித்த கம்பீரத்துக்கும் தோற்று இருக்கிறார் ஆண்டாள்.

தடக்கைச் சதுரன் :

நீண்ட பெரிய கைகளை உடையவர்.
வில்லை வளைக்கையில் மேலும் அழகாகத் தோன்றும் கைகள்.
எதிரிகள் வில் பொகடும்படி வில் பிடிக்கும் சாமர்த்தியம் உடையவர்
அவர் வில்லைப் பிடித்திருக்கும்
வீர அழகைப் பார்க்கும் எந்த எதிரியும் தன் ஆயுதத்தைக் கீழே போட்டுவிடுவான்.
ஆயுதத்தைக் கீழே போட்ட விபீஷணன் வீரனாகக் கொண்டாடப் பட்டு வாழ்ந்தார்.
ஆயுதத்தைக் கீழே போடாத ராவணன் வீழ்ந்து மடிந்தான்.

பொருத்தமுடையன் :

வில்லைச் செலுத்தும் வீர பராக்கிரம
த்துக்கு இணையாகப் சொல்லுமளவு,
பிரணியித்வத்திலும்--அன்புடையார் மீது பிரியம் செலுத்துவதிலும்-- சிறந்தவர்.
சிறந்த வீரனான தலைவன் பிரியமான காதலனாகவும் இருந்தால்,தலைவியின் காதல், அளவு கடந்து இருக்குமன்றோ?

நாங்கள் எம்மில் இருந்தொட்டிய, கச் சங்கம் நானும் அவனும் அறிதும்:

முன்பு நானும்,எம்பெருமானும் சேர்ந்து இருந்த போது நாங்கள் எங்களுக்குள்
"இன்றியமையாமை--ஒருவரை ஒழிய ஒருவர் உளோம்" என்று ஒரு கச்சங்கம்/சங்கல்பம் செய்து கொண்டோம்.--
'நீயின்றி நான் ஜீவித்திருக்க மாட்டேன்'
என்று அவரும்,'தேவரீர் இன்றி நான் ஜீவித்திருக்க மாட்டேன்'என்று நானும் சங்கல்பம் செய்து கொண்டோம்.
ரகசியமாகச் செய்து கொண்ட அந்த சங்கல்பம் அவரும்,நானும் மட்டுமே அறிவோம். "பிறருக்கு தெரிவது ஒன்று இல்லை காண் எங்கள் நிலை"

ஸ்ரீராமர் அநுமனிடம்,"நான் சீதையை விட்டு ஒரு ஷணம் தரிக்க மாட்டேன்"
என்றார்.தூது வந்த அநுமனிடம்,"ஸ்ரீராமர் ஒரு மாதத்துக்குள் வந்து என்னைக் காப்பாற்றாவிட்டால் நான் உயிர் தரிக்க மாட்டேன்" என்றார் சீதை.அங்கு அவர்கள் பிரிந்திருந்தார்கள்;வேறு,வேறுவிதமாகச் சங்கல்பம் செய்தனர்.ஆனால் நாங்கள் முன்பு கூடியிருந்த போது,ஒரேமாதிரியாக
"ஒருவரை ஒழிய, ஒருவர் உளோம்"என்று சங்கல்பம் செய்தோம்.அதை அநுமனிடம் சொல்லி அனுப்பியது போல்,நான் உன்னிடம் சொல்கிறேன்.

பரம ரஹஸ்யமான திருமந்திரத்தை எம்பெருமான் நரனுக்கு உபதேசித்து,அது வழி,வழியாக உபதேசிக்கப்பட்டு,
ஆசார்யரிடம் வந்து சேர்ந்தது(அவர் சிஷ்யனுக்கு உபதேசித்து, எம்பெருமான் திருவடிகளை அடையச் செய்கிறார் ).அது போல,முன்பு,ஆண்டாளுக்கும்/பெருமானு
க்கும் இடையே நடந்த இந்த ரகசிய சங்கல்ப வார்த்தையை ஆசார்ய ஸ்தானத்தில் இருக்கும் குயிலுக்கு உரைத்து,எம்பெருமானோடு சேர்த்து வைக்கும்படி சொல்கிறார்.
ஸ்ரீராமாயணத்திலும் ஸ்ரீ ராமரும்,
சீதையும் தங்கள் திருவுள்ளத்தில் ரகசியமாக இருந்த சங்கல்பத்தை ஆசார்ய ஸ்தானத்தில் இருந்த அநுமனிடம் உரைத்தார்கள்.

தேன்கனி மாம் பொழில் செந்தளிர்
கோதும் சிறு குயிலே:

இளங்குயிலே ! என் கார்யம் செய்து தலைக் கட்ட வேண்டிய நீயோ,நான் படும் பாட்டைக் கண்டு கொள்ளாமல்,நல்ல தேன் போன்று இனிக்கும் மாம்பழத்தை தெவிட்டும் அளவு உண்டுவிட்டு,அந்தப் தெவிட்டைப் போக்கி மீண்டும் உண்பதற்காக,துவர்ப்புச் சுவையுள்ள
சிவந்த,மாந்தளிர்களை குத்தி உண்டு கொண்டிருக்கிறாய்.

திருமாலை ஆங்கு விரைந்து ஒல்லைக் கூகிற்று யாகில்:

நீ திருமால் இருக்கும் அந்த இடத்துக்கு விரைந்து சென்று,அவரிடம் நான் சொன்னதைச் சொல்ல வேண்டும்.
அதுமட்டுமே நான் வேண்டுவது !
திருமால் என்பதால் திருவாகிய
மஹாலக்ஷ்மிப் பிராட்டியார்
புருஷஹாரமும் உதவும் என்பதாம்.
நம் குற்றங்களைப் பொறுப்பித்து,
அவரைப் பதறி நடந்து வரப் பண்ண
வல்ல பெரியபிராட்டியார் அருகே இருப்பதால்,அவர் பதறி நடந்து வரும்படி நீ சடக்கெனக் கூவுவாயாக !

அவனை நான் செய்வன காணே :

நான் படுகிற கிலேசத்துக்கு/ஆற்றாமைக்கு உனக்கு ஒரு பிரயோ
ஜனம்/பலம் இல்லை என்றல்லவோ நீ நினைக்கிறாய் .நீ சென்று கூவியபின் அவர் என்னிடம் வந்து சேரும் சமயத்தில்,
அவர் என்னைப் பிரிந்து,நெடுநாள் என்னைப் படுத்தின பாட்டை எல்லாம் உனக்கெதிரில் நீ பார்க்கும்படி,அவரைப் பாடாயப் படுத்துவேன்.அது கண்டு (சந்தோஷப்படுவதே) உனக்குப் பலம்.

அவர் வந்தால்,நான் முகத்தை மாறவைத்து/தூக்கி வைத்துக்
கொள்வேன்.என் முகத்தைக் காண்பதே அவருக்கு பரவசமூட்டும்.நெடு நாள் பட்டினி கிடந்தவன் முன்னே சோற்றை இட்டு வைத்து,உண்ண முடியாதபடி தடுத்தால்,அவன் கிடந்தது தவிப்பது போலே,அவரும் கிடந்து துடிப்பதைப் பார்ப்பாய் குயிலே ! (ஆண்டாள் முகத்தைப் பார்த்து லயித்தால் அவருக்குப் பசியாறும்.ஆனால்,
ஆண்டாள் அருகேயே இருந்தும் முகத்தைத் திருப்பிக் கொண்டால்,அவர் என்ன பாடுபடுவார் ?)

(--அடியேன் பார்த்தசாரதி ராமாநுஜ தாசன்)

படங்கள்:
1.சார்ங்கம் வளைய வலிக்கும் தடக்கைச் சதுரன்,
2,3,4:பொருத்த முடையன்:

2.ஸ்ரீரங்கம் பரமபத நாதர் சந்நிதியில்,
ஆண்டாள் மூலவர்--திருமாலிருஞ் சோலை பரமஸ்வாமி(மூலவர்) அலங்காரத்தில்.
3.ஆண்டாள் உற்சவர் கள்ளழகர்
(உற்சவர்) அலங்காரத்தில்.
4.நூறுதடா வெண்ணெய்,நூறுதடா நிறைந்த அக்கார அடிசில் வைத்தேன்.

1628220814059.png


1628220821363.png


1628220830431.png


1628220838977.png
 
OP
OP
praveen

praveen

Life is a dream
Staff member
ஸ்ரீ:
ஆடி ஆனந்தம்--"ஆண்டாள் தூது!!!
(பதிவு 22)

5-9"பைங்கிளி வண்ணன் சிரீதரன், என்பதோர் பாசத்தகப் பட்டிருந்தேன்;
பொங்கொளி வண்டிரைக்கும் பொழில் வாழ் குயிலே ! குறிக் கொண்டிது, நீ கேள்
சங்கோடு சக்கரத்தான் வரக் கூவுதல், பொன்வளை கொண்டு தருதல்,
இங்குள்ள காவினில் வாழக் கருத்தில் இரண்டைத் தொன்றேல் திண்ணம் வேண்டும்"


விளக்கவுரை :


மிக்க ஒளியை உடைய வண்டுகள்,மது உண்ட மயக்கத்தாலே,இசை பாடி நின்ற சோலையிலே,களித்து விளையாடுகிற குயிலே !
நான் சொல்லுகிற இதனை நீ பராக்குப்
பார்க்காமல் கவனமாய்க் கேள் !
பசுங்கிளி போன்ற நிறத்தையுடைய னான ச்ரிய பதி, என்கிற ஒரு வலையிலே
நான் சிக்கிக் கொண்டு கிடக்கிறேன்;
நீ இந்தச் சோலையிலே தொடர்ந்து வாழ வேண்டும் என்று விரும்பினால்,திருவாழி
யும், திருச்சங்கும் உடையனான எம்பெருமான்,இங்கே வரும்படி கூவுதல், நான் இழந்த பொன் வளையல்களைக் கொண்டு வந்து கொடுத்தல் ஆகிய இவை இரண்டுள் எதாவதொரு காரியம்
நீ கட்டாயம் செய்து தீர வேண்டும்.

பொங்கொளி வண்டிரைக்கும் பொழில் வாழ் குயிலே ! குறிக் கொண்டிது !நீ கேள்

என்னுடைய கூக்குரல் உன் காதில் விழாத படி,அழகாக மினுமினுத்துக் கொண்டிருக்கும், வண்டுகளின் இசைகள் நிரந்த சோலையிலே,
அந்த இசைகளைக் கேட்டுக் கொண்டு அதுவே போது போக்காக நீ திரிந்து கொண்டிருந்தாலும், நான் உன்னை விடுவேன் அல்லேன்.நான் சொல்வதைக் கவனமாகக் கேள்.ஏனோ தானோ என்று பராக்குப் பார்த்துக்கொண்டு கேட்காமல், வண்டுகளின் இசையிலிருந்து உன் காதுகளை விடுவித்து,என் வாய்ச் சொல்லைக் குறிப்பாக கேள் !

பைங்கிளி வண்ணன் சிரீதரன் என்பதோர் பாசத்து அகப் பட்டிருந்தேன்:

பைங்கிளி போல,பசுமையும்,மஞ்சளும் கலந்த ஒரு வசீகர வண்ணனான சிரீதரன்- லக்ஷ்மிபதி ஆகிய எம்பெருமானின் பாச வலையில் நான் அகப்பட்டிருக்கிறேன்.(பாசம் என்றால் அவரது நேசம் என்னும் வலை அல்லது அவர் வீசிய பாசக்கயிறால் கட்டுண்டு, என்று இருவகைகளிலும் கொள்ளலாம்)
எனக்கு உண்டாயிருக்கும் இந்த நோய் என்னால் தீர்த்துக் கொள்ள முடியாதது.
அவன் வடிவழகு முதலியவற்றில் தோற்றுப் போய்,நடக்கவும் கூட முடியாத மயக்க நிலையில்,இருந்த இடத்திலேயே கிடந்து தவிக்கும்படியான அவஸ்தையில் துவழ்கிறேன்.

""முன்னை அமரர் முதல்வன் வண் துவராபதி மன்னன் மணி வண்ணன் வாசுதேவன் வலையுலே அகப்பட்டேன் -என்றும்
"கற்கின்ற நூல் வலையில் பட்டிருந்த நூலாட்டி கேள்வனார் கால் வலையில் பட்டிருந்தேன் காண் "என்றும்
சொல்லுகிறபடியே மாதவன் ஆகிற வலையிலே நான் அகப்பட்டுக் கொண்டேன்"

இதைக் கேட்ட குயில், "நீ எம்பெருமான் வலையில் அகப்பட்டு இருந்தால் நல்லது தானே ! ஏன் புலம்புகிறாய்? மேலும் இதில் நான் என்ன செய்ய முடியும்"என்று சொல்லி விட்டு,மீண்டும் வண்டுகளின் இசையை அநுபவிப்பதாகக் கொண்டு, பாராமுகமாய் இருக்கிறது.

சங்கோடு சக்கரத்தான் வரக் கூவுதல், பொன்வளை கொண்டு தருதல்,
இங்குள்ள காவினில் வாழக் கருத்தில் இரண்டைத் தொன்றேல் திண்ணம் வேண்டும் !

இதற்கு முந்தைய பாசுரங்களிலும்,இந்தப் பாசுரத்திலும் ஆண்டாள் படும் துன்பத்தை,நன்றாகப் புரியும் படி சொல்லியும்,குயில் ஏதோ புரியாத படி,
நான் என்ன செய்ய முடியும் என்று பாசாங்கு செய்ய,ஆண்டாள் சற்றே கோபமாக மிரட்டும் தொனியில் சொல்கிறார்.

குயிலே நீ இச் சோலையில் இருந்து தானே, வாழ வேண்டும்.என்னை அலட்சியம் செய்தால் (என்னுடைய) இச்சோலையில் உனக்கு வாழ முடியுமோ?
அவர் வராவிட்டால் நான் முடிந்து
போவேன்.நான் முடிந்து போனால் இச் சோலையை உனக்கு நோக்கி-நன்றாகப் பராமரித்து-தருவார் யார்?

ஒன்று,வலக்கை ஆழி, இடக்கை சங்கம் உடையானான எம்பெருமான் இங்கே வரும்படி நீ கூவ வேண்டும்,அல்லது-
என் பொன் வளையல்களை என் கையில் கொண்டு வந்து கொடுக்க வேண்டும்
நீ இங்கு வாழ வேண்டுமானால்,இவை இரண்டினுள் ஒன்றை நீ உடனே,
செய்தாக வேண்டும்.

எம்பெருமானது பிரிவால் களைந்த,கை வளைகள் கை தங்குவது எம்பெருமான் சம்ஸ்லேஷத்தால் மட்டுமே ஆகும்;
அதுவும் அவர் வந்தால் அன்றி ஆகாதே !.

இப்படி இரண்டு பஷமாக சாமார்த்திய
மாகச் சொன்னதற்கு அடி--
சாவித்திரி தன் கணவன்,சத்யவானது உயிரைக் கவர்ந்த யமனிடம் அவனை மீண்டும் உயிர் பிழைப்பிக்க வேண்டும் என்று வேண்ட,யமன் மறுத்து விட்டான்.
மாறாக,சாவித்திரி மீண்டும்,யமனிடம்
தனக்குப் பல பிள்ளைகள் பிறக்கும்படி அருளவும், என்று வேண்ட யமனும் அப்படியே அருளினான.பதிவிரதையான சாவித்திரி கணவன் சத்தியவான் உயிரோடு இருந்தால் தான் பிள்ளை பெறமுடியும் !! அதைப் போலே
இதுவும் ஒரு சமத்காரமான உக்தி !
ஒரு கார்யத்தாலே இரண்டும் தலைக் கட்டும்படிக்கு.

எம்பெருமானுக்கு பல ஆச்சரியமான திருநாமங்கள் இருக்க,'சங்கோடு சக்கரத்தான்' என்றது ஏன்?
"அவருடைய ஆபரணத்தை யாவது--சங்கு,சக்கரம்- இங்கே கொண்டு சேர்
அல்லது என்னுடைய ஆபரணத்தை--பொன்வளை- யாவது கொண்டு கொடு"-என்னும் ரசமான இடம்.அவரை விட்டுப் பிரியாதே அவரோடு பொருந்தி இருக்கும் சங்கு,சக்கரம் என்னிடம் வர வேண்டு
மென்றால்,அவர் இங்கு வந்தாக வேண்டும்.ஆண்டாள் இழந்த பொன்வளைகளை மீண்டும் அணிய வேண்டும் என்றாலும்,அவர் வந்தால் தானே அணிய முடியும்(ஆண்டாளுடைய பொன்வளைகளை அவர் கவர்ந்து சென்றுவிட்டார்; அவர் வந்தால் தானே பொன்வளை வரும்./அல்லது அவரது பிரிவாற்றாமையால் தேகம் தளர்ந்து கை மெலிந்து வளையல்கள கழன்று விழுந்து விட்டன; அவர் வந்தால் அந்த உற்சாகத்தால் தேகம் பூரித்து,கை பருக்கும்.வளைகள் அணிந்தால் விழாமல் கையில் பொருந்தி இருக்கும்!)

அற்புதமான,ஆசார்ய--சிஷ்ய பாவனை !

ஆண்டாள் குயிலிடம்(ஆசார்ய நிலை) "இச்சோலையில் நீ வாழ வேண்டும் என்றால்/மாம்பழ ரசத்தைப் பருகிக் கொண்டு,வண்டுகளின் இன்னிசையைக் கேட்டுக் கொண்டு சுகமாக இருக்க வேண்டுமானால்,நான் அன்றோ, இச்சோலையை உனக்கு நோக்கி-நன்றாகப் பராமரித்துத் தரமுடியும்.(எனவே நான் முடிந்து போகாதிருக்க, அவரை வரும்படி கூவு)" என்று சொல்லியது,
"தேசாரும் சிச்சன் அவன் சீர்வடிவை ஆசையுடன் நோக்குமவன்"
(சிஷ்யன்,ஆசார்யர் செளகரியமாக வாழ எல்லா வசதிகளையும் ஏற்படுத்தித் தர வேண்டும்) என்னும் நுண்ணறிவை உணர்த்துகிறது.
"ஆசார்யன் சிஷ்யன் ஆருயிரைப் பேணுமவன்"(ஆசார்யர் சிஷ்யனின் ஆத்மயாத்திரையைப் பேணி,அவனை எம்பெருமான் திருவடிகளில் சேர்ப்பார்)
என்னும்படிக்கு எம்பெருமானை ஆண்டாளோடு சேர்ப்பித்து வைக்கிறது குயில்.இங்கு குயில், எம்பெருமானைக் கூவி வரும்படி செய்து,உண்மையிலேயே
ஆண்டாளின் உயிரையும் காப்பாற்று கிறது !

(--அடியேன் பார்த்தசாரதி ராமாநுஜ தாசன்)
படங்கள்:
ஸ்ரீரங்கம் பரமபதநாதர் சந்நிதியில்--
1.ஆண்டாள் மூலவர்--அழகிய மணவாளராக
2.ஆண்டாள் உற்சவர்--மந்திரக்கோடி உடுத்தி/மணமாலை சூட்டி...
3,4,5: மைத்துனன் நம்பி மதுசூதன் வந்தென்னைக் கைத்தலம் பற்ற...

1628254804176.png

1628254811680.png

1628254818926.png

1628254826458.png

1628254833545.png
 
OP
OP
praveen

praveen

Life is a dream
Staff member
ஸ்ரீ:
ஆடி ஆனந்தம்--"ஆண்டாள் தூது!!!
(பதிவு 23)

5-10:"அன்று உலகம் அளந்தானை உகந்து, அடிமைக் கண் அவன் வலி செய்ய,
தென்றலும் திங்களும் ஊடறுத்து, என்னை நலியும் முறைமை அறியேன் !
என்றும் இக்காவில் இருந்து இருந்து என்னைத் ததைத்தாதே ! நீயும் குயிலே !
இன்று நாராயணனை வரக் கூவாயேல் இங்குத்தை நின்றும் துரப்பன்"


விளக்கவுரை :

"மஹாபலி பலம் பொருந்தி கொழுத்தி
ருந்த அக் காலத்தில்,மூவுலகங்களையும் அளந்த எம்பெருமான் விஷயத்திலே
உகந்து,நான் கைங்கர்யத்தை ஆசைப்பட,
அவர் கைங்கரியத்திலே வஞ்சனை செய்தார்.அதனால் நான் நோவு பட்டிருக்கிற சமயத்திலே,தென்றல் காற்றும் குளிர்ச்சியான பூரண நிலவும், என் உடலைப் பிளந்து கொண்டு,உள்ளே புகுந்து இம்சிக்கும் நியாயத்தை
அறிகின்றிலேன் .ஓ குயிலே! என் நலனை விரும்பும் நீயும்,எந்நாளும்
இந்தச் சோலையிலே,இடைவிடாமல்
இருந்து கொண்டு என்னை இம்சிக்காதே
இன்றைக்கு ஸ்ரீமந்நாராயணன் இங்கே வரும்படி நீ கூவாமற் போனால்
இந்தச் சோலையிலிருந்து உன்னைத் துரத்தி விடுவேன் !"

அன்று உலகம் அளந்தானை உகந்து :

"வசிஷ்ட சண்டாள விவாகம் அற வரையாதே"–ஞானி--சாமான்யன்,
இன்னார்--இனியார் என்று வேறுபாடு இல்லாமல்,எல்லோர் தலையிலும் திருவடிகளை வைத்து அநுக்ரஹம் செய்த உலகளந்த பெருமானை--தூங்குகிற குழந்தைக்கு ஆசைப் பட்டு,குழந்தை அறியாத/கேட்காத போதே,தாய்ப்பால் ஊட்டும் தாயைப் போலே-- எம்பெருமான் திருவடிகள் தங்கள் தலையில் வைத்து ஆசீர்வதித்தார் என்பதை அவர்கள் அறியாமலே,அவர்களின்
தலைகளில் தனது திருவடிகளை வைத்தவனை---உகந்து.

அடிமைக் கண் அவன் வலி செய்ய :

எம்பெருமானின் அடிமையான நான் ஒன்றைப் பெறுவது,பின்னர்அதனை இழப்பது என்று இப்படியா நான் ஆசைப் பட்டது?சத்தை பெற்று ப்ராப்திபலமான கைங்கர்யம் எப்போதும் சித்திக்க வேண்டும் அன்றோ நான் ஆசைப்பட்டது.
ஆனால் அடிமை செய்யும் எனக்கு கைங்கர்யம் தந்தருளி,இடையே அவர் மிறுக்கடிக்கிறாரே !

தென்றலும் திங்களும் ஊடறுத்து என்னை நலியும் முறைமை அறியேன் :

எம்பெருமானைப் பிரிந்து நான் அல்லல் பட்டுக் கொண்டிருப்பதைப் பார்த்த,
இதமான தென்றலும்,குளிர்ச்சியான சந்திரனும் தங்கள் சுபாவத்துக்கு மாறாக,
இவளை வாட்ட இது தான் சமயம் என்று,கங்கணம் கட்டிக் கொண்டு என்னை இம்சிக்கின்றன.பிரியமானவர்
களைச் சேர்த்து வைப்பதே தென்றல்/திங்களின் வேலை.ஆனால் நாங்கள் பிரிந்திருக்கும் சமயத்தில் இவர்கள் வந்தால் தென்றலும் காயும்;நிலவும் சுடும்.இவர்கள் என்னை வந்து இம்சிப்பது என்ன நியாயம்? நான் ஆசைப்பட்ட எம்பெருமானின் மேன்மை ஒன்றும் அறியாத இவைகள் வந்து என்னை நலிவது என்ன முறையோ?
நான் அறியேன்.
"அடிமையில் வாசி அவை அறியா விறே
அவன் அளந்த கால் வாசியும் கூட அறியாதவை இறே"

ஸ்ரீராமரைப் பிரிந்த சீதையை,"ராவணன் நடுவே வந்து நலிந்தால் போலே
தென்றலும் சந்திரனும் நடுவே வந்து என்னை நலிகைக்கு ஈடாக இருப்பதொரு
முறை யுண்டாக அறிகிறிலேன்"
'முறை உண்டாக அறிகிலேன்' -- பிரியமானவர்களைச் சேர்த்து வைப்பதே தென்றல்/சந்திரனின் முறையாக உண்டாக,பிரிப்பது என்னும் முறை உண்டாக அறிகிலேன்.சீதையையும்,
ராமரையும் சேர்த்து வைத்த தென்றலின்-வாயுவின் புத்திரனான, திருவடி அநுமனுக்கு இருந்த விவேகத்தில் ஒரு கால் கூறும் தகப்பன் வாயுவுக்கு இல்லையே !

சீதையைப் பிரிந்த ராமர்,லஷ்மணரோடு பம்பா நதி தீரத்தில் கிஷ்கிந்தையில் இருந்த போது,பம்பைப் பக்கமிருந்து வீசும் மாருதம்,அங்கே மலர்வனத்தில் இருந்த,தாமரை/செங்கழுநீர் மலர்களைத் தடவிக் கொண்டு நல்ல நறுமணத்தோடு வீசுவது அவருக்கு சோகத்தைத் தருவதாக லஷ்மணரிடம் சொன்னார்.அந்தத் தென்றல்,ராமர் காதுப்பக்கம் வந்து ஊதிக்கொண்டு செல்வது,சீதையின் மூச்சுக்காற்று அவர் காதுபட வீசுவதைப் போல இருப்பதால்
மேலும் அதிகமாக சோகித்தார்.அது போல இந்தத் தென்றல் ஆண்டாளைப் படுத்துகிறது.

என்றும் இக்காவில் இருந்து இருந்து என்னைத் ததைத்தாதே:

அவை என்னை நலிகிற நலிவு காதாசித்தம்--தென்றல் வீசும் போதும்,நிலா குளிரும் போதும் மட்டுமே.
ஆனால் நீ எப்போதும் என்னோடு இந்தச் சோலையிலே இருந்து கொண்டே என்னை நோவு படுத்தாதே !
நாம் இருவரும் ஒரே இடத்தில் இருந்து வாழ்வதால் வந்த அந்யோந்யத்தை பயன்படுத்தி (எனக்கு உதவுவதற்கு மாறாக) என்னை இம்சிக்க வேண்டாம்.

நீயும் குயிலே ! இன்று நாராயணனை வரக் கூவாயேல் :

நாரங்களான சேதந/அசேதநங்களை உடையவரான அவர் என்னை உடையவனாய்,எனக்கு எஜமானனாய் இருப்பதால் என்னைப் புறக்கணிக்
காதே ! இந்த உடைமை அழைத்தால் வருவோரோ என்றும் புறக்கணிக்காதே ! அவருக்கு ஒவ்வொரு சிறு உடைமையும் மிகவும் விருப்பமுடையது.ஆதலால் என்னோடு இருப்பதில் விரும்பும் இருக்கிறவரை வரும்படி கூவவில்லை
என்றால்....

இங்குத்தை நின்றும் துரப்பன்-

உன்னை இந்தச் சோலையிலிருந்து,
துரத்தி விடுவேன் என்று எச்சரிக்கிறார்.
ஆண்டாள் மிரட்டுவது போலத் தோன்றி
னாலும்,அப்படிச் செய்யக் கூடியவர் அல்லவே ஆண்டாள்.இதில் சொல்ல வருவது--அவர் வரும்படி நீ செய்யவில்லை என்றால்,நான் உயிர் தரிக்காது முடிந்து விடுவேன்.பின்னர் யார்,இந்தச் சோலையைப் பராமரித்து,
வளர்ப்பார்கள்? சோலையே அழிந்து விடும்.நீ இங்கிருந்து போய்த்தானே
ஆக வேண்டும்.

——————————————————————

5-11:"விண்ணுற நீண்டடி தாவிய
மைந்தனை, வேல் கண் மடந்தை விரும்பி,
கண்ணுற வென் கடல் வண்ணனைக், கூவு கரும் குயிலே ! என்ற மாற்றம்,
பண்ணு, நான் மறையோர் புதுவை மன்னன் பட்டர் பிரான் கோதை சொன்ன,
நண்ணுற வாசக மாலை வல்லார் நமோ நாராயணாய என்பாரே"


விளக்கவுரை:

வேல் போன்ற கண்களை யுடையவளாய்,
பெண்மைக்கு உரிய குணங்கள் நிறைந்தவளாய், ஸ்வரூபம் விளங்கும் நான்கு வேதங்களையும் ஓதின ஸ்ரீவில்லிபுத்தூருக்குத் தலைவரான பெரியாழ்வாருடைய மகள் ஆண்டாள்.
அவர் அடைய விரும்பிய,உலகளந்த பெருமாளை-- திருவடியானது பரமாகாசத்தளவும் போய்ப் பொருந்தும் படியாக நெடுக வளர்ந்து உலகங்களை வியாபித்த மிடுக்கை யுடைய கடல் வண்ணனான எம்பெருமானை-- வரும்படி கூவுவாய் கருங் குயிலே! என்று அருளிச் செய்த பாசுரங்களால் ஆன, போக்யமான இந்தஸ்ரீ ஸூக்தி மாலையை ஓத வல்லவர்கள், "நமோ நாராயணாய"என்று எம்பெருமானுக்கு நித்யமும், அந்தரங்கக் கைங்கர்யம் செய்யும் பேறு பெறுவார்கள்"

இத் திருமொழியை ஓத வல்லவர்கள்
ஸ்வரூப அநுரூபமான புருஷார்த்தத்தை பெறுவார்--ஜீவனின் சொரூபத்துக்குத் தக்க நித்ய லோகமான பரமபதத்தில் நித்ய கைங்கர்யம் செய்வார்கள் என்று பலன் சொல்லித் தலைக்கட்டுகிறார்.

விண்ணுற நீண்டடி தாவிய மைந்தனை –

உலகளந்த பெருமாள் ஒருவரிடத்தில் ஒன்றைக் கொள்ள/பெற நினைத்தால்,
அவர்களுக்கு ஒன்றும் மிச்சம்/மீதம் இல்லாதபடி முழுதாக அள்ளிக் கொள்வார்.
வாமனனாக வந்த அவர் மாவலியிடம் மூன்றடி மண் இரக்க,மண் கொடுத்த
வனுக்கு ,இருக்க இடம் இன்றியே,பரக்க வைத்து அளந்து விட்டாரே.அந்த பற்பபாதனை நான் விரும்புவதால் சர்வ ஸ்வத்தையும் இழந்து,சந்தியில் நின்று சங்கடப்படுகிறேன், என்று ஆண்டாள் இதன்மூலம் உணர்த்துகிறார்.

வேல் கண் மடந்தை விரும்பி,கண்ணுற,
என் கடல்வண்ணனை:

பல வேல்கள் ஒன்று கூடி,ஒரு முகத்திலே அமைந்திருப்பது போல,கூர்மையான பார்வையுடைய ஆண்டாள் எம்பெருமானை தன் வேல்கண் பார்வைக்கு இரையாக்கத் தேடுகிறாராம்.
இவருடைய நேரான,கூர்மையான,
விழுங்கிவிடும் பார்வை அவரைப் பிச்சை எடுக்கும்படி படுத்துமாம் ! மூன்றடி மண் பிச்சை எடுத்த அவர்,ஆண்டாள் கண் பார்வை கிடைக்கப் பிச்சை எடுக்கும் படியாம்.
"என் கண்ணுக்கு விஷயமாம்படி ஸ்ரமஹரமான வடிவை யுடையவன்"

கடல் வண்ணனைக் கூவு கரும் குயிலே ! என்ற மாற்றம் :

கருமை நிறக் குயில்,கருநீலக் கடல் நிற கண்ணனைக் கூவுவது பொருத்தமாக இருக்குமே.உன் வடிவைக் காட்டி,அவன் வடிவுக்கு ஸ்மாகரமான நீ என்னையும் அவனையும் சேர்க்க வேண்டும் என்று சொன்ன பத்துப் பாசுரங்கள்.

பண்ணு நான் மறையோர் புதுவை மன்னன் பட்டர் பிரான் கோதை சொன்ன:

ஸ்வர பிரதானமான--வேதங்களை ஸ்வர சுத்தியுடன் ஓத வல்லவர்கள் வாழும்
ஸ்ரீ வில்லி புத்தூருக்கு நிர்வாஹகரான-வேதம் வல்லார்களின் தலைவரான பெரியாழ்வார் திருமகள்,கோதை நாச்சியார் சொன்ன.

நண்ணுறு வாசக மாலை வல்லார்:

அனைவரும் விரும்பி சேவிக்கும்படியான,
போக்யமான பாசுரங்களால் கோர்த்த பாமாலை;எம்பெருமானை சிந்தனையில் வைத்துப் போற்ற உகந்த பாமாலை.
எம்பெருமானின் கல்யாண குணங்களை
ப்பேசவந்த வேதங்கள் பலவற்றையும் பரக்கச் சொன்னதால்,சொல்ல வேண்டிய குணங்களைச் சரியாகச் சொல்லாதது போல் அல்லாமல்,அவருடைய குணங் களை நன்றாகஎடுத்து உரைக்கும்படி,
பாடுவோர்/கேட்போர் உள்ளம் உருகும்படி,
அமைந்த பாமாலை--இந்தப் பாமாலையை அர்த்தமறிந்து பாட வல்லார்.

நமோ நாராயணாய என்பாரே :

"நமோ நாராயணா என்று,பல்லாண்டும் பரமாத்மனைச் சூழ்ந்து இருந்து
ஏத்துவார் பல்லாண்டே "என்பது ஆண்டாளின் திருத்தகப்பனார் பெரியாழ்வார் வார்த்தை.பெரியாழ்வார் குலத்துக்கே உண்டான உயர்ந்த குணமான,எம்பெருமானுக்கு"பல்லாண்டு,பல்லாண்டு"என்று மங்களாசாசனம் செய்வதைப் பலமாகப் பெறுவர்.
"நல்லாண்டு என்று நவின்று பல்லாண்டு என்று உரைப்பார், நமோ நாராயணா என்று பல்லாண்டும் ஏத்துவர்" என்று கொண்டு, இப்பூவுலகில் நல்லகாலம் வரப்பெற்று,பல்லாண்டு பாடுவோர்,
இங்கே கிடைத்த பேற்றை பரமபதத்தில் பெற்று நித்யமும்,எப்போதும் மங்களா
சாசனம் செய்து கொண்டிருப்பார்கள்.

மேலும் இந்தப் பாசுரங்களைப் பாட வல்லார், திருஅஷ்டாக்ஷர மந்திரமான திருமந்திரத்தை(ப்ரணவத்துடன் கூடிய நமோ நாராயணாய) அநுசந்திப்பவர்கள்,
பெறக்கூடிய பலனைப் பெறுவார்கள் என்றும் கொள்ளலாம்.

(--அடியேன் பார்த்தசாரதி ராமாநுஜ தாசன்)
படங்கள்:
1.ஸ்ரீரங்கம் வெளி ஆண்டாள் சந்நிதி--பரமபத நாதர் அலங்காரம்.
ஸ்ரீரங்கம் பரமபத நாதர் சந்நிதி:
2.ஆண்டாள் மூலவர்--திருவேங்கடமுடையான்
3.ஆண்டாள் உற்சவர்--குடமாடு கூத்தன்
4.மூலவரும்,உற்சவரும்.

1628399147121.png


1628399191286.png


1628399200495.png


1628399209440.png
 
OP
OP
praveen

praveen

Life is a dream
Staff member
ஸ்ரீ:
ஆடி ஆனந்தம்--"ஆண்டாள் தூது!!!
(பதிவு 24)

ஆண்டாள்,குயிலைப் பலவாறாக
உயர்த்தி வைத்து வேண்டியும், இறுதியில்
எச்சரித்து/ மிரட்டிப் பார்த்தும் தூது சென்று, ஸ்ரீகண்ணபிரானை வரும்ப்படி,
கூவ வில்லை.கூடல் விளையாட்டு
(நெஞ்சு) கூட்டி வைக்கவில்லை.குயிலும் கூவவில்லை.அவரை அடைய வேண்டும் என்னும் தாபம் அதிவேகமாக உந்த, இனி
ஒரு கணமும் தாமதிக்காமல் அவரை அடைய என்ன செய்யலாம் என்று ஆண்டாள் மனம் அலைபாய்ந்து கொண்டி
ருக்க,அவர் ஏன் வராமல் இருக்கிறார்?அவரும் ஆண்டாளை அடைய வேண்டும் என்று விரும்பினாலும்,ஆண்டாளின் பக்தியை இன்னும் பெருக்க வேண்டும், பக்தியும் சொட்டும் பாசுரங்களைக் கேட்க வேண்டும் என்று அவர் திருவுள்ளம் பற்றியதால் அவர் முகம் காட்டாமல் இருக்கிறார்.

கனாக்கண்டேன் தோழீ,நான் !

ஆனால் ஒரேயடியாக தாமதித்தால், ஆண்டாள் உயிர் தரிக்கமாட்டார்என்பதை அறிந்த எம்பெருமான் அவரது கனவில் முகம் காட்டினார்.முகம் காட்டினார் என்றால் எப்படி.--மாப்பிள்ளைக் கோலத்
தில் அழகியமணவாளனாக,
"வாரணமாயிரம் சூழ வலஞ்செய்து
வந்து",வைதீக திருமணத்தில் நடக்க வேண்டிய எல்லா சடங்குகளும் குறைவற நடத்திக் காட்டி,ஆண்டாள் விரும்பியபடி கைத்தலம் பற்றி விட்டார்.இந்தத் திவ்ய திருமண வைபவங்கள் ஒவ்வொன்றை
யும் ஆண்டாள் தன் தோழியிடம் "கனாக்கண்டேன் தோழீ நான்" என்று அழகாக விவரிக்கிறார் "வாரணமாயிரம்" பதிகத்தில்(6).மணநீர் மஞ்சனமாட்டும் அளவும் கனாக் கண்டது சொல்லப் பட்டிருந்தாலும்,ஸம்ஸலேஷமும் கனவில் நடந்ததாகக் கொள்ளவேண்டும்.
கண்விழித்த ஆண்டாள், "ஓ! இவை யாவும் வெறும் கனவாய்ப் போயினவே !
அவர் இப்படியா நம்மை வஞ்சித்தார்? அவர் எப்போது நேரில் வரப் போகிறா
ரோ" என்று மேலும் வியாகூலப்பட்டு, என்ன செய்வது என்று தோன்றாமல் மனம் அலை பாய்ந்து கொண்டிருந்தார்.

சங்கு விடு தூது !!

ஆண்டாள்,தன்னைப் போல கனவில்,
கண்ணபிரானது திருவாய் அமுதத்தைப் பருகினவராய் அல்லாமல்,நித்யமும் அவரது திருவாய் அமுதத்தைப் பருகும் அநுபவம் பெற்றவர் யாரேனும் உளரோ?அன்றி அவர் நம்மை வஞ்சித்தது போலவே,அவர்களையும் வஞ்சித்திருப் பாரோ? என்று சிந்தித்த போது,அவரது இடது திருக்கரத்தில் நித்யவாசம் செய்கிற பாஞ்சஜன்யம் என்னும் திருச்சங்காழ்வான்,இடைவிடாது அவரது திருவாயமுதத்தை அநுபவிக்கும்(அவர் வாயில் வைத்து ஊதுவதால்) பாக்யம் உடையவன் என்று உணர்ந்தார்.அவன் பெற்ற பேறு தான் என்னே! என்று அவன் மேல் ஒரு பக்கம் ஆச்சரியமான பிரீதியும்,மறு பக்கம் சற்றே பொறாமை
யும் கொண்டார்.அவனையே இடை
விடாது நினைத்துக் கொண்டிருந்ததால்,
சங்காழ்வான் ஆண்டாள் கண்ணெதிரே தோன்ற," ஓ! பாஞ்சஜன்யமே கண்ணபிரானது திருப்பவளத்தின் இன் அமுதத்தை இடைவிடாது அநுபவிக்கும் பேறு பெற்றாயே; அத்திருவாயின் பரிமளமும்,அவ்வமுதத்தின் ரசமும் எப்படி இருந்தது?சிறிது சொன்னாய் ஆனால்,
காதினாலாவது கேட்டு மகிழ்கிறேன்"
என்று சொல்வதாகப் பத்துப் பாசுரங்கள் பாடியுள்ளார் ஏழாம் பதிகத்தில்.

சங்கின் அநுபவத்தைச் சொல்லும்படி தானே கேட்கிறார்.தூது அனுப்ப வில்லையே? தன் மனநிலையை சங்கிடம் சொல்லி,கண்ணனிடம் தனக்காகப் பேசச் சொல்ல வில்லயே?
என்பதற்கான விளக்கம்:

"ஆண்டாளுடைய பாக்யம் இருந்தபடி –
புதியதொரு குரங்கைப் பார்த்து –கதமூரூ கதம் பாஹூ-(சுந்தர -35-4)-என்னாதே,தேசிகரைக் கேட்கப் பெற்றாள் இறே"(பெரிய வாச்சான் பிள்ளை)

ஸ்ரீராமாயணத்தில் தூதுவராகச் சென்ற அநுமனிடம்,சீதை ராமரின் சேம நலங்
களை விசாரித்துத் தெரிந்து கொண்டார்.
சீதையைச் சந்தித்துத் திரும்பிய
அநுமனிடம் ராமர்"கதமூரு கணம் பாஹூ"--"சீதையுடைய நடையழகு எப்படியிருக்கிறது? தோளழகு எப்படி இருக்கிறது? சொல்வாய்" என்று வினவினார்.ஸ்ரீராமருக்கும்,சீதைக்கும் ஒரு சில நாட்களே அறிமுகமாயிருந்த ஒரு குரங்கைப்பார்த்து அந்தரங்கமான விஷயங்களை அவர்கள் கேட்டார்கள்.
ஆனால் ஆண்டாள் அப்படி ஒரு குரங்கை
ப்பார்த்துக் கேட்காமல்,பெருமானைவிட்டு ஒருநொடிப்பொழுதும் நீங்காமல் நித்ய அநுபவம் பண்ணிக் கொண்டிருக்கும் உயர்ந்த நிலையில் இருக்கும் சங்கிடம் ஆசார்ய ஸ்தானத்தில் உள்ள(தேசிகரை)
திருச்சங்காழ்வானிடம் கேட்கும் பேறு பெற்றவர்.ராம தூதன் அநுமனைப் போல பிரிந்தவர்களைச் சேர்த்து வைப்பது, ஆசார்யரைப் போல அடியாரை(சீடனை) எம்பெருமான் திருவடியில் சேர்த்து விடுவது --என்னும் இவற்றின் அநுபவத்தை சங்காழ்வானிடம் கேட்டுப் பெறலாம் என்று நினைக்கிறார் ஆண்டாள்.ஆண்டாளின் புண்பட்ட மனதுக்குத் தகுந்த மருந்தாக, சங்காழ்வானின் பதில் இருக்கும். ஆண்டாள் எம்பெருமானோடு நித்யவாசம் பண்ணும் அநுபவத்தை
திருச்சங்கிடம் கேட்டுப் பெறுவதும் ஒரு வகைத் தூது என்று கொண்டு,
இப்பதிகத்தில் உள்ள பாசுரங்களை அநுபவிப்போம்.

பாஞ்சஜன்யத்திடம் கேட்கும் அளவுக்கு
என்ன மகிமை ?

எம்பெருமானின் திருவாயமுதம் அநுபவத்தைச் சொல்லும் அளவுக்கு, பாஞ்சஜன்யத்துக்கு உண்டான சிறப்பு பற்றி பெரிய வாச்சான் பிள்ளை சொல்வது:

1-திரை வளைத்தால் அதுக்குள்ளே வர்த்திக்கும் கூனர் குறளரைப் போலே
அவனைக் கை விடாதே அந்தரங்கனாய் இருக்கையாலும்--எம்பெருமான் சந்நிதி
யில் சில ஆராதனைகளுக்காக திரை இடும்போது அர்ச்சகர்கள் தவிர யாரும் மற்றவரை வெளியே அனுப்பி விடுவார்கள்.ஆனால் செயல் திறன் குறைபாடுள்ள கூனர்,குள்ளர் போன்றவர்களை அங்கேயே இருக்க விடுவர்.அவர்கள் போல,உள்ளேயே,
அவரை விடாமல் உடனிருப்பதால்.

2-தாங்கள் அனுபவிக்கும் துறையிலே இழிந்து அனுபவிக்கும் நிலயனாய் இருக்கையாலும்.--கனவில் தான் அனுபவித்த கண்ணனின் திருவாய் அமுதத்தை எப்போதும அநுவிப்பதால் அந்தத் துறையில் வல்லவர்.

3-தங்களைப் போலே காதாசித்கம் அன்றிக்கே நித்ய சம்ஸ்லேஷம் பண்ணி வர்த்திக்கும் ஒருவனாகையாலும்--
அந்தரங்கமாக இருக்கும் சில சமயங்களில்,பெறும் அநுபவத்தைச் போலல்லாமல் நித்யமாக எம்பெருமான்
வாயமுத அனுபவம் பெறும் சங்காழ்வான்.

4-இனி வினை யுண்டானால் திருவாழி யாழ்வான் திருக் கையை விட்டுப் போய் வியாபாரிக்கும்
–கருதுமிடம் பொருது கைந்நின்ற சக்கரத்தன் (திருவாய் -10-6-8)
இவன் வினை முடுக முடுக திருப் பவளத்திலே அணையும் அத்தனை--
சங்கொடு சக்கரம் என்று இரண்டு ஆயுத ஆபரணங்களும் ஒன்றாகவே சொல்லப் படும் நிலையில்,சக்கரமானது எம்பெருமான் நியமிக்கும் போது,அவரது திருக்கையை விட்டுப் போய் சிரித்தபடி
கைங்கர்யத்தை முடித்து விட்டு,மீண்டும் வந்து அவரது கையில் நிற்கிறது.ஆனால்
சங்கு இருந்த இடத்திலேயே இருந்து,
அதுவும் உத்தமமான எம்பெருமான் திருவாயில் நின்று,அவரை விட்டுப் பிரியாமல் முழங்கி விட்டு,அங்கேயே இருக்கிறது.அதுவும் ஆற்றக்கூடிய செயல் பெரிதானது/முக்கியமானது
என்றால்,அது அவர் திருவாயில் உள்ளே நன்றாகப் புகுந்து,அதிக நேரம் நின்று ஊதும்.--குருஷேத்ரத்தில் நின்று ஊதியம் போல.

5-இனி உகவாத கம்சாதிகள் காணாமைக்கு இறே –உபசம்ஹர -என்றது--
ஸ்ரீகிருஷ்ணர் அவதரித்த போது,நான்கு திருக்கரங்களுடன்,சங்கு,சக்கரங்களோடு தோன்றினார்.ஆனால் கம்சனுக்கு, அவரது அவதார ரஹஸ்யம் தெரியக்
கூடாது என்று,வசுதேவர்,இவற்றை மறைத்துக் கொள் என்று வேண்ட,
கிருஷ்ணர் அவற்றை மறைத்துக் கொண்டு சாதாரணக் குழந்தையாகத்
தோற்மளித்தார்.அப்படியிருக்க அவரிடம் சங்கு எப்படி வந்தது? கம்சனுக்கு தாம் யார் என்பது தெரியக்கூடாது என்பதற்
காககத் தான் மறைத்தார்.ஆனால் அநுகூலர்களுக்குக் காட்டினார்.

6- உகந்த பெண்களுக்கு காட்சி கொடுப்பதும் இவற்றோடு கூடவே இருக்கும் இறே;
வாய்க்கரையிலே போய் இருந்து ஆர்ப்பரவம் பண்ணி
அவார்ப்பரத்திலேயே எதிரிகள் கெடும்படி இருப்பானுமாய்-
இவனை உகவாத கம்சாதிகள் காணாத படி---அவரை உகந்த கோபிகைகள்,
அவருக்கு கம்சனால் நேரிடும் ஆபத்துக்
களிலிருந்து அவரை எப்படிக் காப்பாற்று
வது என்று கவலைப்பட்டிருக்க,கண்ணன் தம்மிடம் இருக்கும் சங்கு,சக்கரங்களைக் காண்பித்து,கவலைப்படாதீர்கள்;இந்தச் சங்கு சக்கரங்கள் என்னைக் காப்பாற்றி விடும் என்று தைரியப்படுத்தினாராம்.

7.இவர்கள் தான் ஸ்யாமமான திருமேனியை அனுபவித்தால்
அதுக்கு பரபாகமான வெண்மையை உடையவன்-ஆகையாலே
சேர அனுசந்திக்க வேண்டி இருக்கும் இறே--கண்ணன் நல்ல கருப்பு நிறத்தில் இருப்பதால் அவரது திவ்ய அழகுத் திருமேனியை சரியாகச் சேவிக்க முடியவில்லையாம்.அவரது கையில் ஏந்தியிருக்கும் தூய வெண்மை நிறத்தில் இருக்கும் சங்கு,வெளிப் படுத்தும் பிரகாசம் அவர் திருமேனியை
நன்றாகச் சேவிக்க உதவுகிறது.

"வெள்ளை விளி சங்கு இடங்கையில் கொண்ட விமலன் "என்றும் –
"பாலன்ன வண்ணத்து உன் பாஞ்ச சன்னியமே போல்வன சங்கங்கள் "--என்றும் ஆண்டாள் பாடியிருப்பதால்,
அவர் இந்த வண்ணச்சேர்க்கையை
விரும்புகிறார் என்பது தெளிவாகிறது.

8- இனி இவன் வார்த்தை கேட்டால்
அவன் வார்த்தை கேட்டால் போலே இனியதாயும் இருக்கும் இறே –-
திருச்சங்கின் வாய் வார்த்தை கேட்டால்
எம்பெருமானின் வார்த்தை கேட்பது போல இனிமையாக இருக்கும்.

(--அடியேன் பார்த்தசாரதி ராமாநுஜ தாசன்)

படங்கள்:
ஸ்ரீவில்லிபுத்தூர் திருஆடிப்பூர உற்சவம்
5 ஆம் நாள்--ஐந்து கருட சேவை--
பெரியாழ்வார்,ஆண்டாள்,ரங்கமன்னார்,
பெரிய பெருமாள்(வடபத்ர சாயி),
திருத்தங்கல் அப்பன்,ஸ்ரீநிவாசப் பெருமாள்,சுந்தரராஜப் பெருமாள்.


1628489103950.png


1628489112991.png


1628489122169.png


1628489136842.png


1628489144814.png


1628489153752.png


1628489163507.png
 
OP
OP
praveen

praveen

Life is a dream
Staff member
ஸ்ரீ:
ஆடி ஆனந்தம்--"ஆண்டாள் தூது!!!
(பதிவு 25)

கண்ணபிரானின் திருவாய் அமுத அநுபவம் நித்யம் பெறுகின்ற திருச்சங்காழ்வானுக்கு"அவருடைய வாக்(வாய்) அம்ருதம் இருக்கும்படி என்ன"
என்பது நன்கு தெரியும் என்பதால்,அதை எனக்குச் சொல்வாயாக என்று அவனைக்
கேட்பதாக அமைந்தது இந்த முதல் பாசுரம்.முதல் பாசுரத்தில் "சொல் ஆழிவெண்சங்கே" என்று கேட்கும் ஆண்டாள் மற்ற எட்டு பாசுரங்களிலும் சொல்/கூறு என்றும் எங்கும் நேராகச் சொல்லவில்லை.அவற்றில் சங்காழ்
வானின் மேன்மை,குணங்கள்,எம்பெருமா
னோடு உள்ள நெருக்கம் ஆகியவற்றை உயர்வாகப் போற்றிப் பாடுகிறார்.
சங்காழ்வானை ஸ்தோத்ரம் செய்தால், அவர் மகிழ்ந்து,தான் கேட்ட விஷ்யத்தைச்
சொல்வார் என்னும்படி ஆகும்.

6-1"கருப்பூரம் நாறுமோ ! கமலப் பூ நாறுமோ !
திருப் பவளச் செவ்வாய் தான் தித்தித்து இருக்குமோ !
மருப்பொசித்த மாதவன் தன் வாய்ச் சுவையும், நாற்றமும்
விருப்புற்று கேட்கின்றேன்,
சொல் ஆழி வெண் சங்கே !"


விளக்கவுரை:

நல்ல வெண்மையான் நிறமும்,கம்பீரமும் உடைய ஸ்ரீபாஞ்ச ஜந்யம் என்னும் சங்காழ்வானே! குவலயாபீடம் என்னும் யானையின் கொம்பை முறித்த கண்ண பிரானுடைய,திரு அதரத்தினுடைய
ரஸத்தையும்,பரிமளத்தையும் உன்னிடம் ஆசையோடு கேட்கின்றேன்.அவரது
அழகிய பவளம் போன்ற சிவந்த திரு அதரமானது,பச்சைக் கற்பூரம் போல்
பரிமளிக்குமோ? அல்லது,தாமரைப் பூப் போல பரிமளிக்குமோ? இனிப்பான
ரஸத்தை உடைத்தாயிருக்குமோ?--
இன்னபடி யிருக்குமென்று எனக்குச் சொல்வாயாக "

கருப்பூரம் நாறுமோ? கமலப் பூ நாறுமோ?

பச்சைக்கற்பூரம் சிறந்த வாசனையோடு இருந்தாலும்,சிறிதளவு அதிகமானாலும்,
எறிச்சு,வெட்டியதாய் இருக்கும்--உறப்பாக,எரிக்கும்படியான காரம் உடைத்ததாய். தாமரை மலர்கள் பறித்தபின் சிறிது நேரம் நல்ல,அலர்ந்த மணமுள்ளதாக இருந்தாலும்,ஆறிக் குளிர்ந்து நிலையில் அதன் மணம் அவ்வளவாக இருக்காது.மிகவும் கொண்டாடத்தக்க மணமுள்ள இந்த இரண்டு பொருட்களுக்குமே இப்படிப்பட்ட குறை இருக்கிறது.எனவே வேறு பொருட்களைப் பற்றிச் சொல்லவே வேண்டாம்.ஆனால் இது போல எந்தக் குறையும்,எப்போதும் இல்லாதபடி"சர்வ கந்த:"முடையவர் அல்லவா எம்பெருமான்!
சர்வவித நறுமணங்களுக்கும் நறுமணத்
துவம் கொடுப்பவரே பகவான் அன்றோ? அவருடைய திருஅதர நறுமணத்துக்கு முன் கருப்பூரம் நாறுமோ? கமலப்பூ நாறுமோ? அத்தகைய திரு நறுமணம் எப்படி இருக்கும் என்று சொல் வெண்சங்கே !

திருப் பவளச் செவ்வாய் தான் தித்தித்து இருக்குமோ ?

திரு அதரங்களைத் தாண்டி, பவளச் செவ்வாய்க்குள் புகுந்து(பெரிதாக ஊதும் வண்ணம்) உள்ளே அனுபவிப்பதைப் பற்றிக் கேட்கிறார்.
'சர்வ கந்த:'என்பது போலே –
'சர்வ ரச :'என்பதாம்.

கந்தத்துக்கு கற்பூரம்/கமலப்பூ என்று சொன்னபடி,ரசத்துக்கு தேன் போல/கன்னல் போலே இருக்குமோ என்று விகல்பித்து கேட்க முடியாதவளாய் இருக்கிறார்.திருஅதர மணத்தை நுகரும் போது பேச முடியும்.ஆனால் பவளச் செவ்வாய் ரசத்தைப் பருகுகையில் பேச முடியாதன்றோ?
"வாய்ப்புக்கு நீராய் ஆழம் காலாய் இருக்கையாலே,வாய்ச்சுவையாய் திகைக்க வைக்கையாலே
இரண்டாவதாக (ஒரு உதாரணம் சொல்லிக்)கேட்க மாட்டாதவள் ஆனாள்"

திருப் பவளச் செவ்வாய் –

எம்பெருமானின் அழகிய திருவாய் அதரங்கள்,ஆண்டாளின் கண் பார்வை
யில் பட்ட போதிருந்தே, அவரது பார்வை அங்கிருந்து வேறெங்கும்--அவரது மற்ற அவயங்கள் மீதும் படாமல் அங்கேயே நிலைத்து நின்றது; ஏனென்றால் பெருமானின் திருப்பவளச் செவ்வாய் சர்வ இந்த்ரியங்களுக்கும் விஷயமாய் இருக்கிறபடி யாதலால்.--விஷ்யாந்தரங்கள் அல்ல !!

சப்த, ஸ்பர்ச, ரூப,ரச,கந்தங்கள் உண்டாய் இருக்கையாலே எல்லா இந்திரியங்க
ளுக்கும் இரை போடுவது அன்றோ இந்த
த்திருப்பவளச் செவ்வாய்?

சப்தம்--சங்கை வாயில் வைத்து ஊதுவதால்.
ஸ்பர்ச--சங்கு திருஅதரங்களில் படும் போது.
ரூபம்--திருப்பவள--சிவந்த நிறமுடைய--
செவ்வாய் அழகு.
ரசம்--பவளச் செவ்வாயின் அமிர்தம்.
கந்தம்: திருஅதரங்கள்/செவ்வாயின் நறுமணம்.

மருப்பொசித்த மாதவன்:

குவலயாபீடம் என்னும், கம்சனின் பட்டத்து யானையின்(மதம் பிடித்த யானை) கொம்பை அநாயசமாக முறித்துக் கொன்றவர்.பிராட்டிமாருக்கு எம்பெருமானின் வீரதீர பராக்கிரமச் செயல்கள் உகப்பானவை.கர,தூஷண யுத்தத்தில் பதினாலாயிரம் அரக்கர்களை தனி ஒருவராக நின்று போரிட்ட ராமரின் வீரத்தால் உகந்த சீதாபிராட்டி அவரை அணைத்துக்கொண்டது போல,
மதயானையின் கொம்பை முறித்துக் கொன்ற கண்ணபிரானின் வீரத்தால் உகந்த ருக்மணிப்பிராட்டி அவரை அணைத்துக் கொண்டார்.ஆதலால் மருப்பொசித்த "மாதவன்".
இங்கு,மாதவன் மாதவன் என்றால் எம்பெருமானின் வாய்ச்சுவைக்கு உரியரான பிராட்டிமார்களின் ஸ்ரீயபதி
என்பதுவுமாம்.

வாய்ச் சுவையும் நாற்றமும்:

அநுபவ சமயத்திலே, நாற்றம்--நறுமணம் முற்பட்டதாய் இருந்தாலும்
அநுபாஷிக்கிற--அந்த அநுபவத்தைச் சொல்கிற இடத்தில் ரசம் முற்பட்டு, கந்தம் பிற்பட்டு இருக்கிறது.பொதுவாக ஒருவர் படித்து,கேட்டு அநுபவித்த விஷயங்களை
பிறரிடம் சொல்லும்போது அண்மையில் (இறுதியாகக்) அநுபவித்த விஷயத்தை முதலில் சொல்வது போல.

விருப்புற்று கேட்கின்றேன் சொல்:

நான்,நீ பெற்ற பேற்றைக் கொண்டாடி மகிழ்கிறேன்.(உன் மேல்,பொறாமை சிறிதும் இல்லாமல்)உன் அநுபவத்தைக் கேட்டுத் தெரிந்து கொள்ள மிக விருப்ப
முடன் இருக்கிறேன்.
நீ சொல்வாய் என்று சங்கை,நியமனம் செய்யும் அதிகாரமும் ஆண்டாளுக்கு உண்டே ! சங்கு எம்பெருமானுக்கு சேவகம் செய்யும் அடிமையாதலால்,
அவரது திவ்யமகிஷியான ஆண்டாளும், அவரை அடிமை கொண்டு நியமிக்கி
லாம் என்னும் முறைப்படி சங்கு சொன்ன
படி செய்யும் என்று விருப்புற்று, 'சொல்'
என்று நியமிக்கிறார்.

எம்பெருமானின் சப்த, ஸ்பர்ச,ரூப,ரச,
கந்த அநுபவங்களில் விருப்புற்றுக் கேட்கிறேன் என்றும் அர்த்தம் கொள்ளலாம்.

ஆழி வெண்சங்கே:

கடலில் பிறந்து வளர்ந்த சங்கு--கடலின் ஆழத்துக்கும்,அகலத்துக்கும்,கம்பீர்யத்துக்கும் தக்கவாறு நீயும் பதில் சொல்ல வேண்டும்.கடல் போன்ற விசாலமான பரந்த மனம் கொண்ட நீ உன் அநுபவத்தைப் பகிர்ந்து கொள்ளலாமே !
கடல் அனைத்துக்கும் தாரகமானால் போலே--நிலப்பரப்பை விட மூன்றுமடங்கு அதிகப் பரப்பை உடைய கடல்,இந்த நிலம் சுபிட்சம் இருக்க பல வளங்களைத் தருகிறது; "ஆழியுட் புக்கு முகர்ந்து கொடு ஆர்த்தேறி" என்னும்படி உயிர் வாழத் தேவையான மழை பொழிய மூல காரணமாக இருக்கிறது.பல கடல்வாழ் உயிரினங்கள்/தாவரங்களை வாழ்விக்
கிறது.அந்த வகையில் கடலில் பிறந்த நீ தக்க பதில் சொல்லி என்னை உயிர் தரிக்கப் பண்ண வேணும்.

வெண் சங்கே :

உனது தூய வெண்மை நிறம் நெஞ்சிலே பட்டால் போலே,உன் வார்த்தையும் நெஞ்சிலே படும்படி--நெஞ்சுக்கு இதமாக
இருக்கும்படி சொல்ல வேண்டும்
பிரியமானவர்கள் விட்டுப் பிரிந்தால்,
பிரிவாற்றாமையால் தேகம் மெலிந்து வெளுத்துப்போவது இயல்பு.ஆனால் அவரை விட்டு விலகாமல், எப்போதும் அவரது அநுபவம் கிடைத்துக் கொண்டிரு
ந்தாலும் உன் தேகம் வெளுப்பு அடைந்து விட்டது.அவர் எங்கே பிரிந்து விடுவாரோ, என்று, இல்லாத ஒன்றைக் கற்பனை செய்து கூட,தேகம் வெளுக்கும்படி அவர் மேல் பிரியமுடைய நீ தான் எனக்குச் சரியான ஆள்.நான் அவரை விட்டுப் பிரிந்து வெளுத்திருக்கிறேனே ! எனது ஆற்றாமையைச் சரியாகப் புரிந்து,
அதைத் சேர்க்கும்படி பதில் சொல்ல வேண்டும்.

(--அடியேன் பார்த்தசாரதி ராமாநுஜ தாசன்)

படங்கள்: ஸ்ரீவில்லிபுத்தூர் திருஆடிப்பூர உற்சவம் 7 ஆம் நாள்(நேற்று)--
ஆண்டாள் மடியில் ரங்கமன்னார்.

1628586894039.png


1628586903416.png


1628586912635.png


1628586921251.png
 
OP
OP
praveen

praveen

Life is a dream
Staff member
ஸ்ரீ:
ஆடி ஆனந்தம்--"ஆண்டாள் தூது!!!
(பதிவு 27)

7-2"கடலில் பிறந்து கருதாது, பஞ்ச சனன்
உடலில் வளர்ந்து, போய் ஊழியான் கைத்தலத்திடரில் குடியேறித்,தீய அசுரர்
நடலைப் பட முழங்கும்,தோற்றத்தாய் நற் சங்கே !"


விளக்கவுரை:

"அழகிய சங்கே! சமுத்திரத்திலே பிறந்து ,
அங்கிருந்து பஞசஜனன் என்ற அசுரனு டைய சரீரத்திற் போய் வளர்ந்து, இப்படி பிறந்த இடத்தையும், வளர்ந்த இடத்தை
யும்,நினையாமல் எம்பெருமானுடைய கைத்தலமாகிற உந்நத ஸ்தானத்திலே குடி புகுந்து,கொடியவர்களான அசுரர்கள் துன்பப்படும்படி ஒலி முழக்கம் செய்யும்
படியான மேன்மை/பெருமை உடையவ னாய் நின்றாய்"

கடலிலே பிறந்து "கருதாது" பஞ்சசனன்
உடலிலே வளர்ந்து :

1.கடலிலே பிறந்த தோஷத்தைக் கருதாது
பஞசஜனன் என்னும் அசுரனின் உடலிலே வளர்ந்து.
2.பிரளயத்தில் அனைத்து ஜீவ ராசிகளுக்கும் தாரகம் ஆன கடல் மிகச்சிறந்த இடம் என்று கொண்டு,
உயர்ந்த இடத்தில் பிறந்தது கருதாது,
தாழ்ந்த அசுரனின் உடலிலே வளர்ந்து.
3.பகவானோடு ஒப்பிட்டால் கடலும்
பஞ்சஜனனும் மிகக் கீழ்நிலையில் உள்ளவர்கள்.ஆதலால் அங்கே பிறந்து,வளர்ந்தது கருதாது பகவான் கைத்தலத்தில் குடிகொண்டது.
4.பகவானின் மேன்மையைக் கருதாத/அறியாத--அகவாயில் (எம்பெருமான் மீது)துவேஷமேயாய்- அசுரன் பஞ்சஜனனின் உடலிலே வளர்ந்து.

5.இவ்வாறாக"சங்கே ! உன் தோஷம் காணாமல் வளர்ந்து,உயர்ந்த இடத்தில் நின்று கொண்டிருப்பது போல,அறியாத
பெண்களான எங்களிடம் உள்ள குற்றம் கருதாது--காணாது உபகரிக்க வேண்டும்.

பிறந்தவாறும்,வளர்ந்தவாறும்,இருந்தவாறும்:

சங்கு,கடலில் பிறந்து,அசுரனனின் உடலில் வளர்ந்து,எம்பெருமான் திருக்கையில் நித்யவாசம் செய்கிறதே?
சங்கு மட்டுமா இப்படி?

ஸ்ரீராமபிரான் அயோத்தியில் பிறந்து, சித்ரகூடத்தில் வளர்ந்து,பஞ்சவடியில் இருந்து வனவாசம் செய்தார் !

ஸ்ரீகிருஷ்ணர் மதுராவில் பிறந்து,
கோகுலத்தில் வளர்ந்து,துவாரகையின் மன்னனாக ஆண்டார் !

எம்பெருமானும் ஸ்ரீவைகுண்டத்திலே இருந்து,திருமாலிருஞ்சோலைக்கு வந்து,
நம்மாழ்வாரின் நெஞ்சிலே வந்து குடி கொண்டார்!(திருமாலிருஞ் சோலை மலை என்றேன்;என்ன ! திருமால்வந்து என் நெஞ்சு நிறையப் புகுந்தான்.)

ஸ்ரீராமாநுஜர் ஸ்ரீபெரும்புதூரில் பிறந்து,
காஞ்சியில் வளர்ந்து,ஸ்ரீரங்கம் வந்து உபயவிபூதிகளுக்கும் உடையவராய்த் திகழ்ந்தார் !

போய் ஊழியான் கைத்தலத் திடரில் குடியேறி :

பஞ்சஜனனின் உடலிலிருந்து போய்,
கால சேஷமான/காலக்கணக்குப்படி
படைக்கப்பட்ட வஸ்துக்களைக் கொண்ட
ஜகத்துக்கு, நிர்வாஹனாய் இருக்கிற சர்வேஸ்வரனுடைய கைத்தலத்திலே மேடை(திடர்) போட்டு அமர்ந்து கொண்டு.

தீய வசுரர் நடலைப் பட முழங்கும் தோற்றத்தாய் நற்சங்கே !

கண்ணபிரான் யது குலத்திலே பிறந்து,
சத்ருவான கம்சனின் அதிகாரத்தில் இருக்கிற திருவாய்ப்பாடியிலே வளர்ந்து,
காலயவன்,ஜராசந்தன் போன்ற அசுரர்களை முடிக்கும் விதமாய்,
ஸ்ரீ த்வாரகையை படை வீடாக--நாட்டின் தலைநகராகச்- செய்து அங்கே குடியேறி,
பின்னர் துரியோத நாதிகளை, மண் உண்ணும் படி செய்தார்.மகாபாரத யுத்தத்தில் எம்பெருமான் ஆயுதம் எடுக்கவே இல்லை.யாரையும் கொல்ல வில்லை; எம்பெருமான் துரியோதநாதி
களின் ஆன்மபலத்தை அழித்து மனதளவில் கொன்றுவிட்டார்.அதன்பின்
அர்ஜுனன் அவர்கள் தேகத்தை
அம்பெய்து கொன்றான்.பகவான் எப்படி அவர்களின் ஆன்மபலத்தைக் கொன்றார்? குருஷேத்ரத்தில் யுத்தம் ஆரம்பிக்கும் முன் கண்ணன் பாஞ்சஜன்யத்தை எடுத்து சங்கநாதம் செய்தார்.அந்த சங்கநாதத்தின் கம்பீர ஒலியால்,கெளரவர்களின் சப்தநாடியும் அடங்கி,உடம்பு உளுத்துப் போனார்கள். அப்போதே அவர்கள் மனதளவில் மாண்டு
விட்டனர்.இவ்வாறாக தீய அசுரர் நடுங்கி ஒடுங்கும்படி, முழங்கிய நற்சங்கே !

நல் சங்கே :

எம்பெருமான் குற்றத்தையும், குணத்தை
யும் கணக்கிட்டு கர்ம அநுகுணமாக அதற்கேற்ப ஸ்ருஷ்டிப்பார்.கர்ம வினைகளுக்கேற்ப ஜீவர்களின் ஆத்ம யாத்திரையை அமைப்பார்.ஆனால் நீ எங்கள் குற்றங்களை/அறியாத்தனத்
தைப் பார்க்காதே,பகவானை உகக்கும் எங்கள் குணங்களை மட்டுமே கொண்டு,
எங்களுக்கு நன்மை--கிருபையால் எங்களை எம்பெருமானோடு சேர்த்து வைத்தல்- செய்யும் நல்ல சங்கே !!(இத்தகு நல்லவனான உனக்கு,ஐ இரு கரையரான எம்பெருமான் ஒப்பு ஆவாரோ !?!? )

இப்பாசுரத்தின் மூலம் சங்காழ்வானுக்கு ஆண்டாள் உணர்த்துவது:

பகவான் கண்ணனை உகவாதாரை அழியச் செய்யும் தன்மையுடைய சங்கே ! அவரை உகப்பாரை வாழ்விக்க வேண்டிய
கடமையும் உனக்கு உண்டல்லவோ? உகவாத துரியோதனாதிகளை உன் சங்கநாதத்தாலேயே நடுங்கச் செய்த நீ தானே குன்டினாபுரத்தில்,கண்ணபிரான் வரவை எதிர் நோக்கித் தன் உயிரைக் கையில் பிடித்துக் கொண்டு இருந்த ருக்மணிப்பிராட்டியின்.உயிரைக் காத்தாய்--ஊருக்குச் சற்று அருகில் சென்றதும் நீ இனிய நாதம் செய்து,கண்ணன் வந்து விட்டார் என்று ருக்மணிக்கு அறிவித்தாய்.எங்கள் உயிரையும் அவ்வாறு காப்பாற்றுவாயாக!

நீ பிறந்து வளர்ந்தது போலே இருக்க வேணும் காண் ! உன் கார்யங்களும் !
உன் பிறப்பும் வளர்ப்பும் பிறருக்காவே அன்றோ ! (கடலுக்காகவோ,பஞ்சஜனனுக்காகவோ அல்லாமல் எம்பெருமானுக்காக அன்றோ)
உன் கார்யங்களும் பரார்த்தமாக வேண்டுமே--பரர்--பிறர்;அந்தப் பிறரான எங்களுக்கு நன்மை பயப்பதாய்.

(--அடியேன் பார்த்தசாரதி ராமாந தாசன்)
படங்கள்:
ஆடிப்பூரத் திருநாளில்---
1.2:ஸ்ரீவில்லிபுத்தூரில் ஆண்டாள்,
ரங்மன்னார் தங்கத்தேரில்.
3.திருப்பதி கோவிந்தராஜப் பெருமாள் சந்நிதியில்
4,5,6:ஸ்ரீரங்கம் பரமபத நாதர் சந்நிதியில்.


1628746404142.png


1628746412597.png


1628746420779.png


1628746429816.png


1628746437947.png


1628746447379.png
 
OP
OP
praveen

praveen

Life is a dream
Staff member
ஸ்ரீ:
ஆடி ஆனந்தம்--"ஆண்டாள் தூது!!!
(பதிவு 28)

7-3"தட வரையின் மீது சரற் கால சந்திரன்
இடை உவாவில் வந்து எழுந்தால் போலே நீயும்,
வடமதுரையார் மன்னன் வாசுதேவன் கையில்,
குடியேறி வீற்று இருந்தாய் !கோலப் பெரும் சங்கே !"

விளக்கவுரை:

"அழகிய பெரிய சங்கே!சரத் கால சந்திரன் பௌர்ணமி தினத்தில்,
பெரிய உதய கிரியிலே வந்து உதித்தாற்போல,நீயும் வடமதுரை
யிலுள்ளார்க்கு அரசானான கண்ண பிரானுடைய திருக்கையில்
குடி புகுந்து உன் மேன்மையெல்லாம் விளங்கும்படி வீற்றிருந்தாய்"

தட வரையின் மீத சரற் கால சந்திரன்:

பெரிய உதய கிரியின் மேலே, சரத் காலத்திலேயே--மேகங்கள் இல்லாத நிர்மலமான ஆகாயத்தில்- எல்லா கலைகளும் நிரம்பின,பூர்ண சந்தரன் வந்து தோன்றினாற் போலே.

இடை உவாவில் வந்து எழுந்தால் போலே:

உவா என்பது பெளர்ணமி,அமாவாசை இரண்டையும் குறிக்கும்.பூரண சந்திரன்
தோன்றியதைச் சொல்வதால் இங்கு, பெளர்ணமியைக் குறிக்கிறது.இடை என்பது சதுர்தசிக்கும் பிரதமைக்கும் நடு என்றபடி.

நீயும் வடமதுரையார் மன்னன்,
வாசுதேவன் கையில் குடியேறி வீற்று இருந்தாய்!

தடவரைத் தோள்களுடைய பெரிய கரிய மலை போன்ற எம்பெருமானது திருக்
கரத்தில்,பூரணசந்திரன் போல, எந்தத் தோஷமும் இல்லாத,தூய வெண்மை நிறமுடைய நீ குடியேறி கம்பீரமாக வீற்றிருக்கிறாய்.உன் ஐஸ்வர்யம்--செல்வாக்கு,பெருமை இருந்தபடி தான்
என்னே ?!

வடமதுரையார் மன்னன் --எம்பெருமானின் மேன்மை /பரத்துவத்தைக் குறிக்கிறது !
வாசு தேவன் --நீர்மை/செளலப்யத்தைச் சொல்கிறது.!
கையில்-'வடிவு அழகு/செளந்தர்யத்தைக் காட்டுகிறது !

யாருக்குமே கிட்டாத பேறான எம்பெருமானது திருக்கையில் நித்ய
வாசம் செய்யும் மேன்மை,பிரியமான
வர்களைச் சேர்த்து வைக்கும் நீர்மை,
கோலப் பெரும் சங்கு என்று சொல்லும்படியான வடிவழகு ஆகிய குணங்கள் உனக்கும் உள்ளனவே !

"வடமதுரையில் உள்ள ஜனங்களுக்கு நிர்வாஹகனாய், ஸ்ரீவாசுதேவர் திருமகனாய் இருக்கிறவனுடைய திருக்கையிலே,ஒரு காலமும் பிரியாத படியாக குடியேறி,உன் ஐஸ்வர்ய வ்யாவ்ருத்தி எல்லாம் தோற்றும் படியாய் இருந்தாய்"

கோலப் பெரும் சங்கே:

மிக அழகான நீ எம்பெருமானது,
திருக்கையிலே ஏறி வீற்றிருப்பது, அவருடைய அழகுக்கு அழகு கூட்டுவ
தாய் உள்ளது.பச்சைமாமலையான அவர் மீது,பூரண சந்திரன் போல வெண்மையும்,
ஒளியும் உடைய நீ நிற்பது,அவரது திருமேனி அழகைப் பிரகாசிக்க வைக்கிறது.
---------------------------------------

7-4:"சந்தர மண்டலம் போல் தாமோதரன் கையில்,
அந்தரம் ஒன்று இன்றி ஏறி, அவன் செவியில்
மந்திரம் கொள்வாயே போலும் ! வலம் புரியே !
இந்திரனும் உன்னோடு செல்வத்துக்கு ஏலானே !"


விளக்கவுரை :

"வலம்புரிச் சங்கே! தாமோதரன்-கண்ண பிரானது திருக்கையில்,சந்திர மண்டலம் போலே,இடைவிடாது இருந்து கொண்டு,
அவருடைய காதில்,ஏதோ ரஹஸ்ய மந்திரம் பேசுகிறாப் போல் நிற்கிறாய்.
செல்வத்தில் மிக்கவனாகப் புகழ் பெற்ற இந்திரனும்,செல்வத்தில்-ஐஸ்வர்யத்தில் உனக்கு இணையாக மாட்டான்"

சந்திர மண்டலம் போல் தாமோதரன் கையில்:

"செருக்கராய் இருக்குமவர்கள் கையிலே குளிரிக் குடம் -பனி நீர்க் குப்பி –
பிடித்துக் கொண்டு இருக்குமா போலே"
--- இளவரசர்கள்/பெரும் செல்வந்தர்கள்
வெயில்,களைப்பு தங்களைப் பாதிக்காத வண்ணம்,வெளியே செல்லும்போது தங்கள் கையில் ஒரு பனிநீர்த் தென்றல் விசிறியை எடுத்துச் செல்வதைப் போல,எம்பெருமான் திருக்கையில் எப்போதும் இருந்து,சந்திர மண்டலம் போல் குளிர்வித்துக் கொண்டிருக்கும் சங்கே !

தாமோதரன் கையில் :

எம்பெருமானைக் கண்டால்,அவர் வயிற்றில் யசோதை கட்டிய தாம்புக் கயிற்றின் தழும்பாலே,அவர்
ஒரு தாயாருக்கு பவ்யனாய் வளர்ந்தார்-என்று தெரிவது போலே,உன்னைக் கண்டால் இவனும் பவ்யன் என்று தோற்றும்படி இருக்க வேண்டாவோ--
எங்கள் வேண்டுகோளைப் புரிந்து
செயலாற்றி எங்களுக்குப் பவ்யனாய் இருக்க வேண்டுமே,என்றும்,ஆனால் அவ்வாறு நீ இல்லையே என்பதையும் உணர்த்துகிறார்கள்.

அந்தரம் ஒன்று இன்றி ஏறி:

அவரை விட்டுச் சற்று நேரமும் பிரியாமல்,
அவர் திருக்கையில் ஏறி--
அவர் விரும்பி இருப்பார் பலரும் உண்டு. ஆனால் அவர்களைப் போலே சிற்சில சமயங்களில் பிரிந்து இருக்காமல்,
வேண்டும் போது கூடி,வேண்டாத போது விலகாமல் அவர் திருக்கையை விட்டு விலகாமல் இருக்கிறாய்.சங்கொடு, சக்கரம் என்று ஒன்றாகக் கொண்டாடப் படும் சக்கரம் எம்பெருமான் கருதுமிடத்
துக்குச் சென்று பொருதுவிட்டு,மீண்டும்
திரும்புகிறது.ஆனால் நீ அவரோடேயே இருக்கும் பேறு பெற்றாயே!
"ஒரு விச்சேதம் இன்றிக்கே
ஒருத்தருக்கு ஓர் ஆபத்து வந்தவாறே கை விட்டுப் போவாரைப் போல் அல்லாமல்"

அவன் செவியில் மந்திரம் கொள்வாயே போலும்:

அவரது இடக்கையில் எப்போதும் நின்று கொண்டு,அவரது செவிக்கு மிக அருகில் இருந்து அவரது செவியில் ஏதோ ரஹஸ்யமாக மந்திரம் சொல்லிக் கொண்டிருப்பது போல் இருக்கிறாயே !
நீ அவரிடம்,"உம்மைப் பிரிந்து ஆற்ற மாட்டார் பலருண்டு"என்றுசொல்லுவது போலே இருக்கிறது.(அவர்களுக்கு வேண்டியதை அர்த்தம் கொள்கிறார்கள்)

கொள்ளுகையும்,கொடுக்கையும்:

மந்திரம் கொள்வாயே என்று சொன்னாலும்,மந்திரம் கொடுத்து,
உத்திரம்(பதில்) கொண்டது அர்த்தமாகிறது.'உம்மைப் பிரிந்து ஆற்ற மாற்றாமல், ஆண்டாள்,ஆய்ச்சிமார்கள் போல பலர் தவிக்கிறார்களே; அவர்கள் துயர் தீர்க்க வேண்டும்' என்று கொடுத்து,
' அவர்களைப் பிரிந்து அவர்களை விட நான் அதிகம் தவிக்கிறேன்; ஆனாலும் அவர்களின் ஆர்த்தியைப் பெருக்குவதற்
காகவே நான் உடனே முகம் காட்டாமல் இருக்கிறேன்' என்று எம்பெருமான் சொன்னதைக் கொள்கிறது சங்கு !

வலம் புரியே:

பொதுவாக இடம்புரி சங்குகளே அதிகம்;வலம்புரி சங்குகள் அரிதானவை.
மற்ற சங்குகளைப் போலல்லாமல்,நீ வலத்திலே புரிந்தால் போலே,
கார்யத்திலும் வேறு பட்டு இருக்க வேணும் காணும்(எங்கள் துயர் தீர்க்க வேண்டும்)

இந்திரனும் உன்னோடு செல்வத்துக்கு ஏலானே:

தான் நினைத்த போது மழை பெய்விப்பது,அல்லாத போது தவிர்த்து விடுவது என்னும் பெரும் சக்தி இந்திரனுக்கு இருப்பதாக நினைத்து,
இந்திரன் தான் மிக அதிகமான செல்வம்/அதிகாரம் படைத்தவன் என்பது ஆய்ச்சியர் பார்வையில்.இந்திரனுக்கு அன்றோ ஆயர்கள் பெருவிழா எடுத்தார்கள் ! அந்த இந்திரனும் உனக்கு--நீ பெற்றிருக்கும் செல்வமான பகவானோடு நித்யவாசம் செய்வதைக் கருதினால்--ஒப்பாக மாட்டான்.

ஆய்ச்சியர் பார்வை அல்லாமல்
பெரியாழ்வார் பெண் பிள்ளையான ஆண்டாளின் பார்வையில்:

இந்திரன் உள்ளிட்ட அனைத்து தேவதைகளுக்கும் அந்தராத்மாக இருந்து நடத்துபவர் எம்பெருமானே ஆதலால், "இந்திர ப்ராணாதி சப்தங்களும் பகவத் வாசகங்கள் என்னும் வாசனையாலே சொல்லிற்றாதல்"இங்கு இந்திரன் என்று ஆண்டாள் ஸ்ரீமந் நாராயணனையே சொல்கிறார் என்பதாம்."மேலிருங் கற்பகத்தை"(பெரியாழ்வார் திருமொழி 4-3-11),"இந்திரலோகம் ஆளும் அச்சுவை பெறினுமே வேண்டேன்"(திருமாலை-2) என்று பாடியபடி.எனவே எம்பெருமானே கூட உன்னுடைய செல்வத்துக்கு ஒப்பாக மாட்டார் !!!

பகவானுடைய "ஸ்வா தந்த்ர்யம்"என்னும் செல்வம்,உன்னுடைய "பாரதந்த்ர்யம்" என்னும் செல்வத்துக்கு ஈடாகாதே.
அவரது ஸ்வாதந்தர்யம் மாறக் கூடியது: ஒரு ஜீவாத்மா அவரிடம் சரணம் அடைந்தால்,அவர் அந்த ஜீவனிடம் பாரதந்தர்யமாக இருக்கத் தலைப்படு கிறார்.ஆனால் உன்னுடைய பாரதந்தர்
யமோ என்றும் மாறாதது; நித்யமானது.
"ஒருவன் அனுகூலித்த வாறே அழியும் அது -ஸ்வா தந்த்ர்யம் – இறே
லஷ்மணோ லஷ்மி சம்பன்ன -என்று நிலை நின்றதாய்த்து இது--பாரதந்தர்யம்"
ஸ்ரீராமர் கோசல நாட்டு மன்னராக முடி சூடிக் கொண்ட பின்,லஷ்மணனை இளவரசாக முடி சூடச் சொன்னார்.
ஆனால் லஷ்மணன் முடியவே முடியாது என்று மறுத்து விட்டார்.என்றும்,ராம கைங்கர்யம் செய்யும் சேவகனாகவே இருப்பேன் என்று,இளவரசு செல்வத்தை மறுத்தவர்,"லஷ்மணோ லஷ்மி சம்பன்ன"
என்று கொண்டாடப்பட்டார்.

"பெருமாள் முடி தவிர்ந்தார் –
இளைய பெருமாள் வகுத்த முடி சூடினார்(பெருமாளுக்கே பாரதந்தர்யமாக இருப்பேன் என்று வகுத்த முடி)"

லக்ஷ்மணருக்கு இணையாக, பாரதந்தர்யம் என்னும் லஷ்மி சம்பந்தத்தைப் பெற்ற சங்கே,எங்கள் பாரதந்தர்யத்தையும் எம்பெருமானிடம் சொல்லி எங்கள் துயர் தீர்ப்பாய்.!!

(--அடியேன் பார்த்தசாரதி ராமாநுஜ தாசன்)

படங்கள்:
திரு ஆடிப்பூரத்தில் திருப்பாவை நாச்சியார்:
1.திருவல்லிக்கேணி
2.திருஎவ்வுள்(திருவள்ளூர்)
3.திருக்கோவிலூர்.
4.திருநாராயணபுரம்.

1628922638315.png


1628922645882.png


1628922654412.png


1628922662156.png
 
OP
OP
praveen

praveen

Life is a dream
Staff member
ஸ்ரீ:
ஆடி ஆனந்தம்--"ஆண்டாள் தூது!!!
(பதிவு 29)

7-5"உன்னோடு உடனே ஒரு கடலில் வாழ்வாரை,
இன்னார் இனையார் என்று எண்ணுவார் இல்லை காண் !
மன்னாகி நின்ற மதுசூதன் வாய் அமுதம்,
பன்னாளும் உண்கின்றாய், பாஞ்ச சன்னியமே !!"

விளக்கவுரை :

"பாஞ்சசன்னியம் என்னும் சங்கே!
ஒரே கடலில்,உன்னோடு கூடவே
வாழ்ந்து கொண்டிருந்த மற்றும் பலரை
இன்னார் இனையார் என்று,ஒரு பதார்த்தமாகவும் மதிப்பாரில்லாத போது
நீ ஒருவன் மாத்திரம்,ஸர்வ ஸ்வாமியாய் எழுந்தருளியிருக்கும்,கண்ணபிரானுடைய திருவாயின் அமுதத்தை,பல காலமாகப்
பருகிக் கொண்டிருக்கும்--நீயே பெரும் பாக்யசாலி !"

உன்னோடு உடனே ஒரு கடலில் வாழ்வாரை:

நீ பிறந்த கடலில் பிறந்து வாழும் மற்ற உயிரனங்கள்--மீன்,திமிங்கலம் முதலானவை,
பொருட்கள்--முத்து,பவளம் முதலானவை
ஆகிய விஜாதீய (உன் இனத்தில் சேராதவை) பதார்த்தங்கள்,மற்றும் உன இனத்தைச் சேர்ந்த பல்வேறு சங்குகள்-சஜாதீய பதார்த்தங்கள்.

இன்னார் இனையார் என்று எண்ணுவார் இல்லை காண் :

இவ்வாறான மற்ற பதார்த்தங்களை என்ன,ஏது என்று யாரும் எண்ணா
திருக்கும் போது, நீ ஒருவன் மட்டும் இத்தகைய உயர்ந்த இடத்தை அடைந்து வாழும் பேறு பெற்றது எப்படி? காட்டில் எத்தனையோ மரங்கள் இருந்தாலும் கண்ணபிரானின் புல்லாங்குழலாக ஆன பெருமையை மூங்கில் பெற்றபடி ! நந்தவனத்தில் எத்தனையோ மலர்கள் பூத்தாலும் எம்பெருமானின் திருவடிகளுக்கு தாமரையின் ஏற்றத்தைச் சொன்னபடி !

ஒரு தேசத்திலே உன்னோடு சேர வாழ்ந்திருப்பவர்களை,அவர்களும் ஸ்வரூபம் பிரகாசிக்க,பெருமையுடன் வாழவேண்டும் என்று எண்ணக் கடவார் இல்லை காண் !

மன்னாகி நின்ற :
🙏🙏🙏🙏🙏🙏
"ராஜாதி ராஜஸ் சர்வேஷாம் விஷ்ணுர்" -என்கிறபடியே என்றும் என்றும் எப்போதும் ஆளும் அகிலாண்டகோடி பிரம்மாண்ட நாயகன்.
மதுசூதன் :

இது பகவானின் ஒரு திருநாமம் மாத்திரமாய் இராமல்,ஆஸ்ரிதருக்கு களை யறுத்துக் கொடுக்குமவன்
ஆய்த்து.மது,கைடபர் போன்ற விரோதிகளை அழித்து அடியார்களின் துயர் தீர்ப்பவர்.(எங்கள் துயர் தீர்க்காமல் இருக்கிறாரே !)

வாய் அமுதம் பன்னாளும் உண்கின்றாய் பாஞ்ச சன்னியமே !

அவருடைய திருவாயில் ஊறும் அமுதத்தை நித்யமாய்-எப்போதும் அநுபவிக்கும்படியாக நீ பெற்ற பாக்கியம் தான் என்னே ! அதை அநுபவிக்கும் உரிமை உடையவர்களான நாங்கள் அந்த அநுபவம் கிட்டாமல் தவித்திருக்க,
நீ நித்ய அனுபவம் பெற்றுக் கொண்டிரு க்கிறாயே !

பாஞ்ச சன்னியமே !

இங்கு இப்படி விளித்தது,தனக்குக் கிடைக்கவில்லையே என்னும் ஆதங்கத்தின் வெளிப்பாடு.
வேதியர்கோன் பட்டர்பிரானான பெரியாழ்வார் வயிற்றிலே பிறந்த நான்,கடலில் பிறந்து அசுரன் வயிற்றில் வளர்ந்த உன் காலில் விழும்படி ஆகி விட்டதே. உயர் குடிப்பிறப்புக்கு ஒரு வாழ்ச்சி இல்லையே !

இதனால் பகவானின் சாம்ய குணம்-- எந்த வேறுபாடும் பார்க்காது,யாருக்கு வேண்டுமானாலும் அநுக்ரஹம் செய்யும் குணம்--உணர்த்தப்படுகிறது.
——————————————————–

7-6"போய்த் தீர்த்தமாடாதே, நின்ற புணர் மருதம்
சாய்த்தீர்த்தான்,கைத்தலத்தே ஏறிக் குடி கொண்டு,
சேய்த்தீர்த்தமாய் நின்ற,செங்கண் மால் தன்னுடைய
வாய்த் தீர்த்தம்.பாய்ந்த்தாட வல்லாய் வலம் புரியே !"


விளக்கவுரை:


"வலம்புரிச் சங்கே! நீண்ட நெடுந்தூரம் கஷ்டப்பட்டு, வழி நடந்து போய்க் கங்கை முதலான புண்ணிய தீர்த்தங்களிலே
நீராட வேண்டியிராமல்,நாரத சாபத்தாலே மரமாய் நின்ற இரட்டை மருத மரத்தை
சாய்த்து முறித்துத் தள்ளின கண்ண பிரானுடைய திருக் கைத்தலத்தின் மீது ஏறி, அங்கே குடிபுகுந்தாய்.பாவனம் மிகுந்து, அதி பரிசுத்தமாக எழுந்தருளி யிருக்கும்தாமரை போலச் சிவந்த,
அழகான கண்களையுடைய, எம்பெருமானின் திருவாய் அமுதம் என்னும் புண்ணிய தீர்த்தங்களுக்கு எல்லாம் புண்ணியமான உயர்ந்த தீர்த்தத்தில் நீராடும் பாக்யம் பெற்றாய் "

போய்த் தீர்த்தமாடாதே :

கங்கை,யமுனை,சரயு, முதலான
புண்ணிய நதிகளில் நீராட,ஆயிரம்காதம், ஐந்நூற்று காதம் நடந்து யாத்திரை போய் அங்குள்ள ஆறு, குளம்,ஊற்றுகளில் முழுகி வரவேண்டிய தேவை இல்லாமல்

நின்ற புணர் மருதம் சாய்த்தீர்த்தான் கைத்தலத்தே:

நாரதரின் சாபத்தால் பல ஆண்டுகளாக இரண்டு மருதமரங்களாய் நின்றனர் நளகூபரன்,மணிக்ரீவன் என்னும் இரண்டு அசுரர்கள்.யசோதையால் உரலில் கட்டப்பட்ட பாலகிருஷ்ணர்,
யசோதையிடமிருந்து தப்பிக்க உரலை
யும் இழுத்துக் கொண்டு தவழ்ந்து
ஓடினார்.உரல் அந்த மருத மரங்களை அசைக்க அவை முறிந்து விழ,அசுரர்கள் சாப விமோசனம் பெற்றனர்.சிறு குழந்தையாக இருக்கும் போதே அவர்களது சாபம் தீர்த்த தீர்த்தன்கையில் குடியிருக்கும் சங்கே, எங்கள் சாபத்தை
யும் தீர்த்து வைக்கச் செய்வாயாக !

ஏறிக் குடி கொண்டு:

கண்ணபிரான் அவதரிக்கும் போதே,
நான்கு திருக்கரங்களுடனும்,சங்கு, சக்கரங்களை ஏந்தியவாறும் தோன்றி னார்.அவரது அவதார ரகசியம் கம்சனுக்குத் தெரியக்கூடாது என்று கருதிய வசுதேவர்,"உபசம்ஹர;
உபசம்ஹர" --'மறைத்துக்கொள்' என்று வேண்ட,கிருஷ்ணர் அவ்வாறே
மறைத்துக் கொண்டார்.நாம் மறைந்து நின்றதால் தானே,எம்பெருமானைப் பல அசுரர்களும் தாக்க முற்பட்டனர்;
இனிமேல் மறையாமல்,அவர் கையில் முன்னால் நின்று,அவருக்குத் தீங்கு நினைப்போரை நடுங்கச் செய்ய வேண்டும் என்று தீர்மானித்ததாம் !
"நாம் மறைந்து நாலு நாள் நிற்கையால் இறே,இப் பிரமாதம் புகுந்தது என்று-
இனி ஒருநாளும் பிரிய ஒண்ணாது என்று திருக் கையை விடாதே வர்த்திக்கிறான் ஆய்த்து"

சேய்த்தீர்த்தமாய் நின்ற செங்கண் மால்:

மிகப்பரிசுத்தமான,அதி பாவநமான கிடைத்தற்கரியதாய் எட்ட முடியாத நெடுந்தூரத்தில் உள்ள சிறந்த தீர்த்தமாக விளங்கும் செந்தாமரைக் கண்ணனான சர்வேஸ்வரன்.

"சேய்த்தீர்த்தமாய் நின்ற"என்ற அடைமொழி செங்கண்மாலுக்கும் ஆகலாம், செங்கண்மால் தன்னுடைய
வாய்த்தீர்த்தத்துக்கும் ஆகலாம்.

தன்னுடைய வாய்த் தீர்த்தம் பாய்ந்தாட வல்லாய் :

கடலில் அமுதம் படும் துறையில் நீராடுவது போல,புண்ணிய நதிகளில் பூர்வாசார்ய ஸ்வாமிகள் நீராடிப் புனிதம் அடைந்த துறைகளில் நீராடுவது போல(சங்கணித்துறை,ஆளவந்தார் படித்
றை,தவராசன் படித்துறை போல), எம்பெருமானது திருமுக மண்டலம் என்னும் நீர்(மை)ப்பரப்பில் சிறந்த துறையான வாழ்க்கையில் நின்று தீர்த்தமாடும் பேறு பெற்றாய் !

வலம்புரியே :

அவருடைய வாயமுதம் பருகும் அநுபவத்தில் ஏற்றம் பெற்றபடி,
சந்நிவேசத்திலும்--இருக்கும் இருப்பிலும் ஏற்றம் பெற்றதைச் சொல்வது.
எல்லோரும்(இடம்புரிகளாக) எங்கெங்கோ போய்த்தீர்த்தமாட, நீயோ(அரிய வலம்புரியாக) இருந்த இடத்தில் இருந்தே, புண்ணிய தீர்த்தங்களுக்கெல்லாம் புனிதமான
எம்பெருமானின் வாய்த் தீர்த்தத்தில் நீராடும் பேறு பெற்றாய் !

எம்பெருமானின் வாய்த்தீர்த்தம்:

எம்பெருமானின் வாய்த்தீர்த்தத்தால் புனிதமடைந்த யமுனை ஆற்றை "தூய பெருநீர் யமுனை"என்று கொண்டாடு கிறார் ஆண்டாள். கண்ணபிரான் யமுனை ஆற்றில்,வாய் கொப்பளித்தும்/நீராடியும் மகிழ்ந்ததால்,அவரது வாய்த்தீர்த்தம் சேர்ந்து,யமுனை "தூயபெரு நீர்" ஆயிற்றாம்.

(--அடியேன் பார்த்தசாரதி ராமாநுஜ தாசன்)
படங்கள்:
1.மதுசூதன் வாயமுதம்...உண்கின்றாய்.
2.சேய்த்தீர்த்தமாய் நின்றசெங்கண்மால்..
...கைத்தலத்தே ஏறிக் குடிகொண்டு.
3,4: வலம்புரிச் சங்கு.

1628998059385.png


1628998067189.png


1628998076284.png


1628998083132.png
 
OP
OP
praveen

praveen

Life is a dream
Staff member
ஸ்ரீ:
ஆடி ஆனந்தம்--"ஆண்டாள் தூது!!!
(பதிவு 30)

7-7:"செங்கமல நாண் மலர் மேல்,தேன் நுகரும் அன்னம் போல்,
செங்கண் கருமேனி வாசுதேவனுடைய,
அங்கைத் தலமேறி அன்ன வசம் செய்யும்,
சங்கரையா ! உன் செல்வம் சால அழகியதே !!"


விளக்கவுரை:

"அப்போதலர்ந்த செந்தாமரைப் பூவில் படிந்து தேனைப் பருகுகின்ற அன்னப் பறவை போன்று,சிவந்த திருக் கண்களை
யும், கறுத்த திருமேனியையும் உடைய கண்ணபிரானது,அழகிய கைத் தலத்தின் மீதேறி கண் வளர்கின்ற
சங்குகளிற் சிறந்த பாஞ்ச ஜந்யமே!
உன்னுடைய செல்வமானது மிகவும்
சிறந்தது காண்"

செங்கமல நாண் மலர் மேல் தேன் நுகரும் அன்னம் போல் :

செந்தாமரையில் அப்போது அலர்ந்த செவ்வி மலர் மேலே,அன்னம் படிந்து அமர்ந்து,(அன்னம் அமர்ந்து தேன் பருகுமளவு பெரிய தாமரை)தேனைப் பருகுவது போல.--அப்போது அலர்ந்த மலரில் வடியும் தேன் தான் மிகச்
சிறந்ததாம்.சிவந்த தாமரை
யில்,கருஞ்சிவப்பு நிறத்தில் ஊறும் தேனைப் பருகும், வெள்ளை அன்னப்
பறவை போல, கருநீல வண்ணனின் திருக்கரத்தின் சிவப்பு உட்புறத்தில் அவரது அநுக்ரஹம் என்னும் தேனைப் பருகும் வெண்மையான சங்கு ! பாஞ்சஜன்யம் என்னும் பெரிய சங்கு கைத்தலத்தில் சுகமாக அமரும் அளவு பெரிய சிவந்த கையுடைய எம்பெருமான்.

செங்கண் கரு மேனி வாசுதேவன் உடைய அங்கைத் தலமேறி :

"வாத்சல்ய பிரகாசகமான திருக்கண்
களையும்,தாபம் அடைய ஆறும்படி குளிர்ந்த வடிவையும் உடைய ஸ்ரீ வஸூ தேவர் திருமகன்"

"அஹம் அன்னம்,அஹம் அன்னம்--
பகவானுக்கு அடியேன் அடிமை;அவருக்கு போக்யமான வஸ்து, என்று சொல்லி வந்த சங்கு அநுக்ரஹமாகிய தேனைக்
குடித்தபின்,அஹம் அந்நாத அஹம் அந்நாத--அடியேன் அடிமை இல்லை;
நான் உம்மை அநுபவிக்க வந்திருக்கிறேன் என்று அகங்காரத்தில் சொன்னாலும் அந்தக் குற்றத்தைக் காணாமல் குணமாகக் கொள்ளும் வாத்சல்யம் கொண்ட செங்கண்

கருமேனி....அங்கைத் தலமேறி அன்ன வசம் செய்யும்:

அழகிய திருக்கையிலே ஏறி அவருடைய அளவற்ற அநுக்ரகத்தைப் பெற்ற சங்கு உண்ட மயக்கத்தில் இடம்,வலம் எங்கும் புரண்டு உருளுமளவு பெரிய அழகிய கை.அவருடைய கரும்பச்சைத் திருமேனி யில்,உள்ள அங்கங்கள் திருவடிகள்,
திருக்கரங்கள்,திருக்கண்கள் எல்லாமே ஒரு கரும்பச்சைத் தடாகத்தில் பூத்த தாமரை மலர்கள் போல.அந்த அழகிய தாமரைக் கையில் தேன் பெருகும் அன்னம் போல வெண்மையை உடைத்தான பாஞ்சஜன்யம்.

சங்கரையா:

சங்குகளுக்கு அரையன்--அரசன்/தலைவன்--'புள்ளரையன் கோயில்' என்று திருப்பாவையில் பாடியது போல !
ஸ்ரீராமர்,சுக்ரீவனுக்கு மகாராஜராக முடி சூட்டுவதற்கு முன்பே,அவரை வானரராஜனே என்று வால்மீகி அழைத்தது போல ! ஜடாயுவையும் கழுகு அரசன் என்று அழைத்தாற் போல !
வேறொரு கோணத்தில்,
"வானர ராஜர்,கழுகு அரசர் போலே,
சங்கரையா என்று அவனுக்கு எம்பெருமானோடு உள்ள நெருக்கத்தால் ஆண்டாள் விளிக்கிறார்"

பகவத் பிரத்யாசத்தியத்தாலே--பகவானுக்கு மிக நெருக்கமாக இருப்ப தால்,உன்னுடைய செல்வாக்கைக் கண்ட மற்ற சங்குகள் எல்லாம் உன் காலிலே விழுந்து,"நீ தான் எங்கள் அரசன்/அரையன்" என்று வேண்டி ஏற்றுக் கொண்டபடி உள்ளதன்றோ உன் ஐஸ்வர்யம்.

உன் செல்வம் சால அழகியதே:

பாசுரம் 7-4 ல் "இந்திரனும் உன்னோடு செல்வத்துக்கு ஏலானே "என்ற சொன்ன ஒப்பீடு ஒன்றுமில்லை என்று சொல்லும்படி,உன்னுடைய செல்வம்/செல்வாக்கு மிகச் சிறந்ததாக உயர்ந்ததாக உள்ளதே !!

(--அடியேன் பார்த்தசாரதி ராமாநுஜ தாசன்).

படங்கள்: செங்கண் திருமேனி வாசுதேவன்--ஸ்ரீ புண்டரீகாக்ஷப் பெருமாள்,திருவெள்ளறை.

1629086350405.png


1629086361125.png


1629086371117.png
 
OP
OP
praveen

praveen

Life is a dream
Staff member
ஸ்ரீ:
ஆடி ஆனந்தம்--"ஆண்டாள் தூது!!!
(பதிவு 31)

7-8:"உண்பது சொல்லில், உலகு அளந்தான் வாய் அமுதம் !
கண் படை கொள்ளில், கடல் வண்ணன் கைத் தலத்தே !
பெண் படையார் உன் மேல் பெரும் பூசல் சாத்துகின்றார் !
பண்பு அல செய்கின்றாய், பாஞ்ச சன்னியமே !!"


விளக்கவுரை:

"பாஞ்ச சன்னியம் என்னும் சங்கே!,
நீ உண்பது என்ன வென்றால், உலகங்க ளை அளந்தவனான,எம்பெருமானுடைய திருவாயிலுள்ள அம்ருதம் !
நீ படுத்துக் கொள்வது எங்கே யென்றால்
கடல் போன்ற நிறத்தை யுடையனான எம்பெருமானுடைய திருக் கையிலே !
இப்படி,உனக்கு ஊணும், உறக்கமும் அங்கேயாய் இருப்பதனால் பெண்
குலத்தவர்கள் அனைவரும்,உன் விஷய மாக,பெரிய கோஷம் போடுகிறார்கள்--எங்கள் ஜீவனத்தை(நாங்கள் உண்பதை/படுத்துக் கொள்ளும் இடத்தை), இவனே கொள்ளை கொள்ளுகிறான் என்று கூச்சலிடுகிறார்கள்--.இப்படி அவர்கள் வருந்தும்படி, அநியாயமான காரியத்தைச் செய்கிறாய்.
இது உனக்குத் தகுதி அல்ல.!"

உண்பது சொல்லில்,உலகு அளந்தான் வாய் அமுதம் ,கண் படை கொள்ளில் கடல் வண்ணன் கைத் தலத்தே !

"நீ உண்ணும் படி சொல்லவா?
உறங்கும் படி சொல்லவா?
வாயது கையதான ஐஸ்வர்யம் அன்றோ உன்னது"--நீ இருக்குமிடமான பகவானின் கையும்,அமுதம் பருகும் அவரது திருவாயும் மிக அருகில் அமைந்தபடி.
அன்றிக்கே, நீ கையிலே அமிர்தம் வாங்கி வாயிலிட்டு உண்ட பின்னும்,கையிலு
ள்ளது குறையாதபடி,வாயிலுள்ளதும் குறையாத படியுமான அமிர்தப் பிரவாகம்.
சேஷபூதர் ஆன அடியார்கள் எல்லாரும் பொதுவாக ஆஸ்ரயிப்பது எம்பெருமானின் திருவடிகளில்.ஆனால் உனக்குக் கிடைத்திருப்பதோ
"அடி சூடும் அரசு அல்லவே – வாக் அமிர்தத்தை யாய்த்து புஜிக்கிறது"

வாயாலே ஊட்ட உண்டு(எம்பெருமான் வாயில் வைத்து ஊதும்போது,வாயாலே ஊட்டுகிறார்),நன்றாக உண்டபின், அங்கேயே இருக்கும் அவரது கைத்தலம் என்னும், செளகர்யமான படுக்கையில்,நீ
ஸ்ரமஹரமான வடிவைக் கடைக் கணித்துக் கொண்டு(ஒருங்களித்து சுகமாக இருக்கும் நிலையில்)சாய்ந்து படுத்திருக்கும் அழகு தான் என்னே !
போக்யமான பிரசாதத்தை உண்டுவிட்டு, அங்கேயே படுத்துக் கிடப்பாரை(மீண்டும் எழுந்து,உண்டு மீண்டும் படுத்து) போலே !

அன்றிக்கே பெருமாள் பிரசாதமான பூ,சந்தனம் முதலானவற்றைச் சூடிக் கொண்டு கோயில் வெளிப்பிரகாரத்தி லேயே கிடந்து இருப்பாரைப் போலே !

பெண் படையார் உன் மேல் பெரும் பூசல் சாத்துகின்றார் :

எம்பெருமானின் திருவாய் அமிர்தமும் அவரது பேரழகு வடிவமுமே,ஜீவனமாய்-
உயிர் வாழக் காரணமாய் இருக்கிற ஆய்ச்சிமார் முதலாக, பெண்ணாகப் பிறந்தவர்கள் அனைவரும்,கூட்டமாகக் கை தூக்கி ஆட்டி,அசைத்து உன்னைத் திட்டிக் கூச்சலிடுகிறார்கள்."எங்கள் ஜீவாதாரத்தை,இருப்பிடத்தை நீ ஒருவனே ஆக்கிரமித்துக் கொண்டாய்" என்று.

திருவாய்ப் பாடியில் உள்ள கோபிகை
களும்,வடமதுரைப் பெண்களும் ஒன்றாகச் சேர்ந்து கூச்சலிடுகிறார்
களாம்! கிராமத்துப் பெண்களான தங்களை விட்டு,மதுரா நகரத்துக்குச் சென்ற கண்ணபிரான் ஆய்ப்பாடிக்குத் திரும்பவே இல்லை.மதுரா நகரத்து, நாகரிகமான பெண்கள், கண்ணனை ஈர்த்துத், தங்கள் ஊரை விட்டுச் செல்லாமல் செய்து விட்டனர் என்று,
அவர்கள் மேல்,ஆய்ப்பாடி ஆய்ச்சியர்கள் கோபமாக இருந்தனர்.ஆனால் தற்போது தங்கள் இருவர் இடத்துக்கும் போட்டியாக இந்த சங்கு வந்து விட்டதே என்று அனைவரும் சேர்ந்து சங்கைச் சாடுகிறார்கள் !!

பண்பு அல செய்கின்றாய் :

பகவத் விஷயத்திலே ஈடுபட்ட நீர்மை/இரக்கம், உடையராய் இருப்பார் செய்வது அல்ல, நீ செய்வது ! பாகவதர்களாகிய எங்களோடு சேர்ந்து, கூடியிருந்து குளிராமல் நீ மட்டும் தனியாக அனுபவிப்பது பண்பு அல்ல !பகவானுக்கு நெருக்கமாக உள்ளவர்கள்,
"இனியது தனி அருந்தேல்" என்னும்படி
பகவானை "நமக்கு -என்று தனி அனுபவிப்பார் இல்லை காண்"

பாஞ்சசன்னியமே !

"உன்னைச் சொல்லி என்ன பயன்? உன் பிறப்பு அப்படி" என்கிறார்.

"வாழாட்பட்டு நின்றீர் உள்ளீரேல் வந்து மண்ணும் மணமும் கொண்மின்"என்று திருத்தகப்பனார் பெரியாழ்வார் பாடிய படியும்,"போதுவீர் போதுமினோ,
நேரிழையீர் ! சீர்மல்கும் ஆய்ப்பாடிச் செல்வச் சிறுமீர்கள்"என்று தாம் திருப்பாவையில் பாடியபடியும்,
அடியார்களோடு கூடி இருந்து குளிரும் உயர்ந்த குணம் அவர்களுக்கு சிறந்த குடிப்பிறப்பால் வந்தது.ஆனால் "கடலில் பிறந்து,அசுரன் வயிற்றில் வளர்ந்த உனக்கு இந்தப் பெருமையான குணம் எங்ஙனம் வாய்க்கும்?"

(--அடியேன் பார்த்தசாரதி ராமாநுஜ தாசன்)

படங்கள்:
1.உலகளந்தான்,கடல் வண்ணன்-- கைத் தலத்தே கண்படை கொண்ட சங்கு !
2.பெண் படையார்.

1629168511721.png


1629168536328.png
 
Top
Thank you for visiting TamilBrahmins.com

You seem to have an Ad Blocker on.

We depend on advertising to keep our content free for you. Please consider whitelisting us in your ad blocker so that we can continue to provide the content you have come here to enjoy.

Alternatively, consider upgrading your account to enjoy an ad-free experience along with numerous other benefits. To upgrade your account, please visit the account upgrades page

You can also donate financially if you can. Please Click Here on how you can do that.

I've Disabled AdBlock    No Thanks