Quotable Quotes Part II - Page 752
Tamil Brahmins
Page 752 of 752 FirstFirst ... 252652702742748749750751752
Results 7,511 to 7,515 of 7515
  1. #7511
    Join Date
    Sep 2010
    Location
    Coimbatore, India
    Posts
    59,157
    Downloads
    0
    Uploads
    0
    Thumbs Up/Down
    Received: 70/11
    Given: 22/3

    0 Not allowed! Not allowed!
    #265 to #269

    #265. வினைகளைக் கடப்பார்.

    வழி நடப்பார், இன்றி , வானோர் உலகம்
    கழி நடப்பார்; நடந்தார் கரும்பாரும்
    அழி நடக்கும் வினை ஆசு அற ஓட்டிட்டு
    ஒழி நடப்பார், வினை ஓங்கி நின்றாரே.


    அறவழியில் நிற்பவர் அடைவர் தேவர் உலக இன்பம். தீய நெறியில் நடப்பவர்களுக்குக் கிடைக்காது இந்த இன்பம். அவர்கள் இருள் மிக்க நரகத்தில் நடப்பவர்கள் ஆவார்கள். காமம், கோபம், மயக்கம் போன்ற மன மலங்களை ஒழித்து விட்டு நல்ல வழியில் நடப்பவர்கள் வினைகளைக் கடந்து நிற்பார்கள்.


    #266. துறக்கம் ஆள்வர்!


    கனிந்தவர் ஈசன் கழல்அடி காண்பர்;
    துணிந்தவர் ஈசன் துறக்கம் அது ஆள்வர்
    மலிந்தவர் மாளும் துணையும் ஒன்று இன்றி
    மெலிந்த சினத்தினுள் வீழ்ந்து ஒழிந் தாரே.


    கனிந்த மனதுடன் எல்லா உயிர்களிடத்தும் கருணை செய்பவர் இறைவனின் திருவடிகளின் தரிசனம் பெறுவார். உலகப் பற்றினை ஒழித்துவிட்டு மனம் துணிந்து தவம் செய்பவர் இறைவனுடன் இணையும் சாயுஜ்ய நிலையை அடைவர்.
    உலக வாழ்வில் இருந்துகொண்டு அறம் அற்ற செயல்களைச் செய்தால் இறைவன் ஆசி கிடைக்காது. காலனின் சினம் கிடைக்கும். அஞ்சத் தகுந்த நரகத்தில் இடம் கிடைக்கும்.


    #267. அறம் அறியாரே


    இன்பம் இடர் என்று இரண்டு உற வைத்தது
    முன்பு அவர் செய்கையினாலே முடிந்ததும்
    இன்பம் அது கண்டும் ஈகிலாப் பேதைகள்
    அன்பு இலார் சிந்தை; அறம் அறியாரே.


    இன்பமும், துன்பமும் பொருந்தியுள்ளன உலகினில். முற்பிறப்பில் செய்த அறச் செயல்கள் இன்பம் தரும். முற்பிறப்பில் செய்த மற்றச் செயல்கள் துன்பம் தரும். இதைக் கண்ட பிறகும் பிறருக்கு எதையும் கொடுக்காத மனிதர்கள் அன்பு என்பதே இல்லாதவர்கள். அவர்கள் அறத்தை அறியாதவர்கள்.


    # 268. தீமை செய்பவன் ஒரு விலங்கு


    கெடுவதும் ஆவதும் கேடுஇல் புகழோன்
    நடு அல்ல செய்து இன்பம் நாடவும் ஒட்டான்
    இடுவதும் ஈவது எண்ணுமின் இன்பம்
    படுவது செய்யின் பசு அது ஆமே.


    ஒருவன் கேட்டை அடைவதும் ஆக்கத்தை அடைவதும் இறைவன் இச்சைப் படி நடக்கின்ற செயல்கள் ஆகும். நேர்மை இல்லாத செயல்களைச் செய்பவன் இன்பம் அடைவதை இறைவன் ஒருநாளும் அனுமதிக்க மாட்டான். எனவே பிறருக்கு அன்புடன் கொடுப்பதையும் வறியவர்க்கு மனம் கனிந்து இடுவதையும் சிந்தனை செய்யுங்கள். பிறர் இன்பத்தைக் கெடுப்பவன் ஒரு விலங்குக்குச் சமம்.


    #269. புன் மக்களைப் போற்றன்மின்


    செல்வம் கருதிச் சிலர் பலர் வாழ்வு எனும்
    புல்லறி வாளரைப் போற்றிப் புலராமல்
    இல்லம் கருதி இறைவனை ஏத்துமின்
    வில்லி இலக்கு எய்த விற்குறி ஆமே.


    செல்வம் கருதி அறிவற்ற புன்மக்களைப் போற்றிப் புகழாதீர்கள். அவர்கள் தரக் கூடிய அழிகின்ற செல்வத்தை நாடி வாடாதீர்கள். அழியாத செல்வம் ஆகிய வீடு பேறைத் தரவல்லவன் இறைவன். அவனையே என்றும் நாவாறப் போற்றிப் புகழுங்கள். வில் வீரனின் அம்பு இலக்கைத் தவறாது அடையும். அது போன்றே உங்கள் வார்த்தைகள் இறைவனை அடையும். அவன் உங்கள் வறுமையை நீக்கி வாழ்வில் இன்பம் தருவான்.



  2. #7512
    Join Date
    Sep 2010
    Location
    Coimbatore, India
    Posts
    59,157
    Downloads
    0
    Uploads
    0
    Thumbs Up/Down
    Received: 70/11
    Given: 22/3

    0 Not allowed! Not allowed!
    18. அன்புடைமை

    #270 to #274


    #270. அன்பே சிவம்

    அன்பு சிவமிரண் டென்ப ரறிவிலார்
    அன்பே சிவமாவ தாரு மறிகிலார்
    அன்பே சிவமாவ தாரு மறிந்தபின்
    அன்பே சிவமா யமர்ந்திருந்தாரே.


    அன்பாகிய சக்தி தேவியும், அறிவாகிய சிவபிரானும், இரண்டு ஆகும் என்பர் அனுபவம் அறிவும் அற்றவர்கள். அன்பு முதிர்ச்சி அடைந்தால், சிவம் ஆகிய அறிவு விளங்கும். இந்த உண்மையை உலகில் எவருமே அறிவதில்லை. அன்பின் முதிர்ச்சி அறிவை விளங்கச் செய்வதை அறிந்த பின் அன்பே வடிவாக மாறி அறிவாகிய சிவத் தன்மையை அடைவர்.


    #271. அன்பு செய்ய வேண்டும்


    பொன்னைக் கடந்து இலங்கும் புலித் தோலினன்
    மின்னிக் கிடந்து மிளிறும் இளம் பிறை
    துன்னிக் கிடந்த சுடுபொடி ஆடிக்குப்
    பின்னிக் கிடந்ததுஎன் பேரன்பு தானே.


    பொன்னை வெல்லும் ஒளியுடைய புலித் தோல் அணிந்தவன்; மின்னல் போல் ஒளிரும் அழகிய பிறைச் சந்திரனைச் சூடியவன்; பிறை நிலவு பொருந்திய வெண்ணீ ற்றின் ஒளியில் விளங்குபவன். அந்தப் பெருமானிடத்தே சென்று பொருந்தியுள்ளது எனது பேரன்பு.


    #272. என்பே விறகு!


    என்பே விறகா இறைச்சி அறுத்திட்டுப்
    பொன்போல் கனலில் பொரிய வறுப்பினும்
    அன்போடு உருகி அகம் குழைவார்க்கு அன்றி
    என்போன் மணியினை எய்த ஒண்ணாதே.


    தன் எலும்புகளையே விறகாக எரிக்கலாம். தன் இறைச்சியையே அறுத்து
    இடலாம். கனலில் அதைப் பொன் போல வறுக்கலாம். ஆனால் அன்போடு தன் உள்ளம் உருகி மனம் நெகிழ்பவர்களால் மட்டுமே என் போல் இறைவனை அடைய முடியும்.


    #273. ஈரம் உடையவர்


    ஆர்வம் உடையவர் காண்பார் அரன் தன்னை
    ஈரம் உடையவர் காண்பார் இணை அடி
    பாரம் உடையவர் காண்பார் பவம் தன்னை
    கோர நெறி கொடு கொங்கு புக்காரே.


    இறைவனைக் காணும் அன்பு மனம் கொண்டவர் இறைவனைக் காண்பார் தான் விரும்பியபடியே. அன்பான மனம் நெகிழும் ஈரத் தன்மை கொண்டவர் இறைவன் திருவடிகளைத் தலையில் சூடுவர். சம்சார பாரத்தைச் சுமப்பவர் பிறவிப் பெருங்கடலில் மூழ்கி பெரும் துன்பம் அடைவர். அன்பு என்பதையே அறியாதவர் கொடிய கானகத்தில் போகும் வழி தெரியாமல் மிகவும் துன்புறுவர்.


    #274. அன்போடு வழிபடுங்கள்


    என்அன்பு உருக்கி இறைவனை ஏத்துமின்
    முன்அன்பு உருக்கி முதல்வனை நாடுமின்
    பின்அன்பு உருக்கிப் பெருந்தகை நந்தியும்
    தன்அன்பு எனக்கே தலை நின்றவாறே.


    அன்பு கொண்ட உள்ளத்தை உருக்கி இறைவனை ஏத்துங்கள். முதன்மையான அன்பினை உருக்கி முதல்வனை நாடுங்கள். அப்போது இறைவனும் தன் அன்பைக் காட்டி நம் பந்த பாசங்களை அகற்றி விடுவான். அவன் அருளைத் தரும் விதம் இதுவே.



  3. All views expressed by the Members and Moderators here are that of the individuals only and do not reflect the official policy or view of the TamilBrahmins.com Website.
    If you are having a problem with a particular thread or user, please use the "REPORT POST" button beside the offending post to inform us or raise a complaint.
  4. #7513
    Join Date
    Sep 2010
    Location
    Coimbatore, India
    Posts
    59,157
    Downloads
    0
    Uploads
    0
    Thumbs Up/Down
    Received: 70/11
    Given: 22/3

    0 Not allowed! Not allowed!
    #275 to #279

    #275. அன்பு வலை

    தான்ஒருகாலம் சயம்பு என்று ஏத்தினும்
    வான்ஒரு காலம் வழித் துணையாய் நிற்கும்
    தேன்ஒரு பால் திகழ் கொன்றை அணிசிவன்
    தான்ஒரு வண்ணம் என் அன்பில் நின்றானே.


    சிவபெருமானை ஸ்வயம்பு என்று எண்ணிப் புகழ்ந்தால் அது வானத்தில் பொருந்தி வழிபடுபவருக்கு ஒரு நல்ல துணை ஆகும். தேன் போன்ற இன்மொழி பேசும் உமை அன்னையைத் தன் இடப் பக்கத்தில் கொண்டு, கொன்றை மலர்களை அணிந்த சிவன், என் அன்பு வலையில் வந்து அகப்பட்டுக் கொண்டான். இன்னதென்று கூற முடியாத வண்ணத்துடன் நின்றான்.


    #276. பெருமானை அறிகிலர்


    முன் படைத்து இன்பம் படைத்த முதலிடை
    அன்பு அடைத்து எம் பெருமானை அறிகிலார்
    வன்பு அடைத்து இந்த அகலிடம் வாழ்வினில்
    அன்பு அடைத்தான் தன் அகலிடத்தானே.


    இறைவன் இந்த உலகினை முதலில் படைத்தான். உயிர்களுக்காக எல்லா இன்பங்களையும் படைத்தான். எல்லா உயிர்களுக்கும் ஒரே தலைவனாகிய அவனிடம் அன்பு செலுத்தாமல் அவனை அறியாமல் இருக்கின்றனரே! உறுதியையும், தனது அன்பினையும் படைத்த பெருமானே இந்த விரிந்து பரந்த உலகமாகவும் விளங்குகின்றான்.


    #277. சிவ ஒளி


    கருத்து உறு செம்பொன் செய் காய்கதிர்ச் சோதி
    இருத்தியும் வைத்தும் இறைவன் என்று ஏத்தியும்
    அருத்தியுள் ஈசனை ஆரருள் வேண்டில்
    விருத்தி கொடுத்திடும் விண்ணவர் கோனே.


    உள்ளத்தில் பொருந்தும் போது உருகிய செம்பொன்னைப் போல ஒளிரும் ஜோதி வடிவானவன் நம் இறைவன்.மனதில் அவனை இருத்துங்கள்; மாறாமல் வையுங்கள். அவனே நம் தலைவன் என்று போற்றிப் புகழுங்கள். அன்பு கொண்ட மனதுடன் அவனை யார் வேண்டிக் கொண்டாலும் தேவர்களின் தலைவன் ஆகிய அவன் அங்கு தன்னுடைய சிவ ஒளியைப் பெருகச் செய்வான்.


    #278. அண்ணலை நாடுகிலரே!


    நித்தலும் துஞ்சும் பிறப்பையும் செய்தவன்
    வைத்த பரிசு அறிந்தேயும் மனிதர்கள்
    இச்சையுளே வைப்பர் எந்தை பிரான் என்று
    நச்சியே அண்ணலை நாடிகிலரே.


    ஜீவனுடைய வினைகளுக்கு ஏற்பப் பிறப்பையும் இறப்பையும் அமைக்கிறான் ஈசன். அவன் வைத்துள்ள முறையை அறிந்த பிறகும் உலக இன்பத்தில் நாட்டம் கொள்கின்றனர். என் தந்தையே! எம் பிரானே! என்று அன்புடன் அவனை விரும்பி வணங்குவதில்லை. அவர்கள் செயல் எவ்வளவு அறிவின்மை!


    #279. துணையாவான்


    அன்பின் உள்ளான் புறத்தான் உடலாய் உள்ளான்
    முன்பின் உள்ளான்; முனிவர்க்கும் பிரான் அவன்
    அன்பினுள் ஆகி அமரும் அரும் பொருள்
    அன்பினுள்ளார்க்கே அணைதுணை ஆமே.


    இறைவன் இருப்பது எங்கெங்கே எப்படி என்று அறிவீரா? அவன் தன்னை அறியும் அறிவு கொண்டவர்களின் தூய அன்பில் இருப்பான். தன்னிடத்தில் இருப்பது போன்றே மற்றவர்களிடத்தும் பொருந்தி நிற்பான். அவன் அன்பையே தன் உடலாகக் கொண்டவன். உலகம் தோன்றுவதற்கு முன்பே உள்ளான். உலகம் அழிந்த பின்னும் அவன் இருப்பான். ஆத்மா ஞானம் தேடுபவர்களின் தலைவன் அவனே. அன்பு பூண்டவரிடம் நிலையாகப் பொருந்தும் அரும் பொருள் அவன். அன்பின் வழியில் தன்னை நாடி வருபவர்களை அவன் உய்விப்பான்.



  5. All views expressed by the Members and Moderators here are that of the individuals only and do not reflect the official policy or view of the TamilBrahmins.com Website.
    If you are having a problem with a particular thread or user, please use the "REPORT POST" button beside the offending post to inform us or raise a complaint.
  6. #7514
    Join Date
    Sep 2010
    Location
    Coimbatore, India
    Posts
    59,157
    Downloads
    0
    Uploads
    0
    Thumbs Up/Down
    Received: 70/11
    Given: 22/3

    0 Not allowed! Not allowed!
    19. அன்பு செய்வோரை அறிவான்

    #280 to #284


    #280. அன்பு செய்வான்

    இகழ்ந்ததும் பெற்றதும் ஈசன் அறியும்
    உகந்து அருள் செய்திடும் உத்தம நாதன்
    கொழுந்து அன்பு செய்து, அருள் கூர வல்லார்க்கு
    மகிழ்ந்து அன்பு செய்யும் அருள் அது ஆமே.


    சிவன் அறிவான் தன்னிடம் அன்பு செய்வதை இகழ்பவர் யார்; தன்னிடம் மெய்யான அன்பு செய்பவர் யார் என்பதை நன்றாக. உத்தம நாதன் அவன் அதற்கேற்ப மகிழ்வுடன் அருள் செய்வான். தளிர்த்து வளரும் அன்பைத் தன்னிடன் காட்டுபவர்களுக்கு அவனும் மிகவும் மகிழ்ந்து அன்புடன் அருள் செய்வான்.

    #281. பிறவி இன்பமாகும்


    இன்பம் பிறவிக்கு இயல்வது செய்தவன்
    துன்பப் பிறவித் தொழில் பல என்னினும்
    அன்பிற் கலவி செய்து ஆதி பிரான் வைத்த
    முன்பப் பிறவி முடிவது தானே.


    பிறவிகள் இன்பம் பெறுவதற்காகச் சிவபெருமான் அனைத்தையும் அழகாக வகுத்து அமைத்துள்ளான். ஆயினும் பிறவிகளில் வரும் துன்பங்கள் பலப் பல! அவற்றைப் போக்குவதற்காகச் செய்யப்படும் செயல்களும் பலப்பல. எது எப்படியாயினும் சிவபெருமான் மீது நீங்காத அன்பு செய்யவேண்டும். அப்படிச் செய்தால் சிவன் அருளால் இந்தப் பிறவி இன்ப மயம் ஆகும்.

    #282. துன்புறு கண்ணிகள் ஐம்பொறிகள்


    அன்புஉறு சிந்தையின் மேல்எழும் அவ்ஒளி
    இன்பு உறு கண்ணியொடு ஏற்க இசைந்தன
    துன்புஉறு கண் இயைந்தாடுந் துடக்கற்று
    நண்புஉறு சிந்தையை நாடுமின் நீரே.


    அன்பு கொண்ட உள்ளத்தின் மீது ஒளியாக விளங்குவான் சிவன். இன்பம் தரவல்ல விழிகளை உடைய சக்தி தேவியுடன் அவனும் அடியவர்களுக்கு அருள் புரிவதற்குத் திருவுள்ளம் கொள்வான். அப்போது வலை போல ஜீவனைச் சிக்க வைக்கும் ஐம்பொறிகளுடன் ஜீவன் கொண்டிருந்த தொடர்பு அற்றுப் போய்விடும். அப்போது சிந்தையை நட்புணர்வுடன் சிவன் மீது செலுத்தி துன்பம் தரும் பொறிகளில் இருந்து விலகியே நில்லுங்கள்.

    #283. பேரின்பம்


    புணர்ச்சியுள் ஆயிழைமேல் அன்பு போல
    உணர்ச்சியுள் ஆங்கே ஒடுங்க வல்லார்க்கு
    உணர்ச்சி இல்லாது குலாவி உலாவி
    அணைத்தலும் இன்பம் அதுஇது ஆமே.


    சிற்றின்பம் துய்க்க மங்கையின் மீது அன்பு கொள்ள வேண்டும். அதை போன்ற அன்புடன், தம் சிரசின் உச்சியில் உதிக்கும் ஸ்பரிச உணர்வில் பொருந்தி இருக்க அறிந்தவர்களுக்கு, உணர்வு அழிந்து துவாதசாந்தத்தில் சென்று சிவனுடன் கூடுவது, அந்தச் சிற்றின்பத்தை விடப் பல மடங்கான பேரின்பமாக இருக்கும்.

    #284. முன்பு நிற்பான்!


    உற்றுநின் றாரொடும் அத்தகு சோதியைச்
    சித்தர்கள் என்றும் தெரிந்து அறிவார் இல்லை;
    பத்திமை யாலே பணிந்து அடியார் தொழ
    முத்தி கொடுத்து அவர் முன்பு நின்றானே.


    பேரின்பத்தில் திளைப்பவரோடு விளங்கும் சோதியாகிய சிவபிரானைச் சித்திகள் பெற்ற சித்தர்களாலும் ஆராய்ச்சி செய்து அறிந்து கொள்ள முடியாது. பக்தியோடு அவனை வணங்கித் தொழுபவர்களுக்கு அவன் வீடு பேற்றை அளிக்க விரும்பி அவனே அவர்கள் முன்பு வந்து காட்சி அளிப்பான்.


  7. All views expressed by the Members and Moderators here are that of the individuals only and do not reflect the official policy or view of the TamilBrahmins.com Website.
    If you are having a problem with a particular thread or user, please use the "REPORT POST" button beside the offending post to inform us or raise a complaint.
  8. #7515
    Join Date
    Sep 2010
    Location
    Coimbatore, India
    Posts
    59,157
    Downloads
    0
    Uploads
    0
    Thumbs Up/Down
    Received: 70/11
    Given: 22/3

    0 Not allowed! Not allowed!
    #285 to #289

    #285. அன்பினால் காணலாம்

    கண்டேன் கழல்தரு கொன்றை யினான்அடி,
    கண்டேன் கரிஉரி யான்தன் கழல்இணை
    கண்டேன் கமல மலர்உறை வான்அடி
    கண்டேன் கழல் அது என் அன்பினுள் யானே.


    கண்டேன் தன் திருவடிகளைத் தரும் கொன்றை மலர் சூடியவன் இணையடி!
    கண்டேன் கரிய ஆணவ யானையின் தோலை அணிந்து கொண்டவன் கழலடி!
    கண்டேன் மூலாதாரத்தில் உள்ள தாமரையில் உறைவும் சிவன் திருவடி!
    அவன் கழல்கள் என் அன்பினுள் விளங்குவதை நான் கண்டேன்!

    #286. அன்பனை அறிகிலர்!


    நம்பனை நானா விதப் பொருள் ஆகும்என்று
    உம்பரில் வானவர் ஓதும் தலைவனை
    இன்பனை இன்பத்து இடை நின்ற இரதிக்கும்
    அன்பனை யாரும் அறியகிலாரே.


    நம்புவதற்கு உரியவன் சிவபெருமான். நானாவிதப் பொருட்களாகத் திகழ்பவனும் அவனே. வானுலகத் தேவர்கள் போற்றும் தலைவன் அவனே. இன்பமே வடிவான பெருமான் அவனே. ஜீவர்களின் இன்பத்தில் மகிழும் அன்பனும் அவனே. யாருமே இத்தகைய இறைவனை அறியவில்லை.

    #287. யாம் அறிவோம் என்பர்!


    முன்பு பிறப்பும் இறப்பும் அறியாதார்
    அன்பு இல் இறைவனை யாம் அறிவோம் என்பர்;
    இன்பப் பிறப்பும் இறப்பும் இல்லான் நந்தி
    அன்பில் அவனை அறியகிலாரே.


    இன்பத்தினால் வந்த பிறப்பு இல்லாதவன் ஈசன். இறப்பு என்பதும் இல்லாதவன் நம் ஈசன், பிறப்பும் இறப்பும் இல்லாத ஞானியர் இங்ஙனம் கூறுவர். அன்புடன் வழிபட்டு யாம் இறைவனை அறிந்துள்ளோம் என்பர். அப்படி இருந்த போதிலும் மற்றவர்கள் ஈசனை உணர்ந்து தங்கள் பிறப்பு இறப்பைப் போக்கிக் கொள்ள வில்லையே.

    #288. ஈசன் ஈட்டி நின்றானே!


    ஈசன் அறியும் இராப் பகலும் தன்னைப்
    பாசத்துள் வைத்துப் பரிவு செய்வார்களை
    த்
    தேசு உற்று இருந்து செயல் அற்று இருந்திடில்
    ஈசன் வந்து எம் இடை ஈட்டி நின்றானே.


    இரவும் பகலும் தன்னிடம் மிகுந்த அன்பு செய்பவரை நன்றாக அறிவான் நம் சிவபெருமான். அவனுடைய ஒளியைப் பெற்று அந்த ஒளியிலேயே இருந்து கொண்டு தனக்கென்று எந்தச் செயலும் இல்லாது இருந்தோம் என்றால் இறைவன் நம்மிடம் வந்து எழுந்தருள்வான்; எப்போதும் பிரியாமல் நம்முடன் தங்குவான்.

    #289. மஞ்சனம்


    விட்டுப் பிடிப்பதென் மேதகு சோதியைத்
    தொட்டுத் தொடர்வன் தொலையாப் பெருமையை
    எட்டும் என் ஆருயிராய் நின்ற ஈசனை
    மட்டுக் கலப்பது மஞ்சனம் ஆமே.


    மேலான ஒளிவடிவான ஈசனை விட்டு விடுவது ஏன்? மீண்டும் சென்று இறைவனைப் பிடிப்பது ஏன்? நான் அவனை உறுதியாகப் பற்றிக் கொண்டு தொடர்வேன். என்றும் குறையாத பெருமையைப் பெறுவேன். என் உயிரில் கலந்து விளங்குகின்ற ஈசனுடன் நான் இனிதாகக் கலப்பதே மஞ்சனம் என்னும் நீராடல் ஆகும்.
  9. All views expressed by the Members and Moderators here are that of the individuals only and do not reflect the official policy or view of the TamilBrahmins.com Website.
    If you are having a problem with a particular thread or user, please use the "REPORT POST" button beside the offending post to inform us or raise a complaint.

Posting Permissions

  • You may not post new threads
  • You may not post replies
  • You may not post attachments
  • You may not edit your posts
  •